Россияда икки ОАВ, сиёсатчи ва журналистга «чет эл агенти» мақоми берилди

«Кедр.медиа» портали, талабаларнинг «Гроза» журнали, сиёсатчи Алексей Малов ва журналист Сергей Шелин Россияда «чет эл агентлари» деб эълон қилинди.

Фото: Alexander Scherbak/TASS/picture alliance

Атроф-муҳит масалаларига ихтисослашган «Кедр.медиа» интернет нашри, шунингдек, ёшлар сиёсати ва олий таълим муаммолари ҳақида ёзувчи «Гроза» талабалар журнали 10 ноябр, жума куни Россия Адлия вазирлиги томонидан «чет эл агентлари» реестрига киритилди. Бундан ташқари, ушбу мақом Сергей Колдобский тахаллуси остида ишлайдиган журналист Сергей Шелин, псковлик тарихчи ва сиёсатчи Алексей Маловга берилган.

«Кедр.медиа» тушунтиришича, Адлия вазирлиги нашр «чет эл агентларининг ахборот материалларини чекланмаган доирага тарқатишда, шунингдек, Россия давлат ҳокимияти ва бошқаруви органлари томонидан қабул қилинган қарорлар ҳақидаги ёлғон маълумотларни тарқатишда иштирок этган», деб ҳисоблайди.

Россияда экологик ташкилотлар учун чекловлар

Россияда атроф-муҳитни муҳофаза қилувчи ташкилотлар мунтазам равишда хорижий агентлар реестрига киритилади ва номақбул деб тан олинади, дея таъкидлайди журналистлар. Март ойи бошида Россия Адлия вазирлиги «Бутунжаҳон табиатни муҳофаза қилиш фонди»ни (WWF) «чет эл агентлари» реестрига киритди ва у «табиатни муҳофаза қилиш фаолияти ниқоби остида Россия ҳокимият органларининг қарорларига таъсир қилиш» ва «саноат лойиҳаларини ривожлантиришга тўсқинлик қилиш билан шуғуллангани»ни маълум қилди.

2023 йил апрел ойида Россия Бош прокуратураси Норвегиянинг «Беллона» экологик жамғармасини, май ойида - Greenpeace ва июн ойида - World Wide Fund for Nature (WWF) халқаро ноҳукумат ташкилотини номақбул ташкилот деб эълон қилди. Шундан сўнг, Россия Бутунжаҳон табиатни муҳофаза қилиш жамғармаси миллий ташкилоти (илгари: «WWF Россия») Швейцарияда жойлашган World Wide Fund for Nature (World Wildlife Fund, ёки WWF) билан муносабатларини тўхтатди, шунингдек, «Панда» логотипи ва WWF қисқартмасидан фойдаланиш бўйича келишувни бекор қилди.

2023 йил июл ойида Россияда номақбул ташкилот мақоми табиатни муҳофаза қилиш ва Олтойнинг туб аҳолисини қўллаб-қувватлаш билан шуғулланадиган The Altai Project Америка нодавлат ташкилотига берилди.

Журналист Сергей Шелин ва сиёсатчи Алексей Малов ҳақида

Сергей Шелин - сиёсий шарҳловчи, Санкт-Петербургдаги «Балтинфо» ахборот агентлиги билан узоқ вақт ҳамкорлик қилади. 2015 йилда ушбу агентлик Россияда «чет эл агенти» мақомини олди, шундан сўнг у ёпилди. Мустақил матбуотга кўра, Россиянинг Украинага кириши бошланганидан кейин Сергей Шелин Финландияга кўчиб ўтган.

Алексей Малов - Россия Федерацияси Коммунистик партияси аъзоси, Псков вилояти Гдовский туманининг собиқ муниципал депутати.