Тошкентдаги хонадондан йирик миқдордаги пиротехника воситаларининг яширин омбори топилди

Ҳуқуқни муҳофаза қилувчи идоралар ходимлари ҳамкорлигида ўтказилган тадбирда Сергели туманидаги хонадонда йирик миқдордаги пиротехника воситалари сақланаётгани аниқланди. Бу ҳақда Kun.uz’га Божхона қўмитаси матбуот хизмати хабар берди.

Маълум қилинишича, пойтахтнинг Сергели туманидаги аввалдан кузатувга олинган шахснинг хонадони белгиланган тартибда кўздан кечирилган. Жараёнда у ерда хорижда ишлаб чиқарилган ва муқаддам турли йўллар билан республикага олиб кирилган 162 153 дона салют ва петардалар,  рақамли маркировка кодларига эга бўлмаган 9 500 қути тамаки маҳсулотлари сақланаётгани фош этилган.

Тезкор тадбир давомида олиб қўйилган пиротехника воситалари ва тамаки маҳсулотларининг умумий қиймати дастлабки ҳисоб-китобларга кўра 1 млрд сўмдан ошмоқда. Ҳозирда ҳолат юзасидан терговга қадар текширув ҳаракатлари давом эттирилмоқда.

Қайд этилишича, жорий йилнинг ўтган даври мобайнида қиймати салкам 2,7 млрд сўмлик 3 млн 158 минг донадан зиёд пиротехника воситаларининг яширин айланмасига чек қўйилган.

Олдинроқ Фарғонадаги хонадондан 79,2 минг дона пиротехника воситалари топилганди.