Малайзия Ўзбекистондан чинни буюмлар ва озиқ-овқат маҳсулотларини импорт қилмоқчи

«Дунё» хабарига кўра, учрашувда Малайзия томонига Ўзбекистонда озиқ-овқат саноатини ривожлантириш бўйича олиб борилаётган чора-тадбирлар, маҳаллий озиқ-овқат маҳсулотларининг рақобатбардошлигини ошириш ва уларни диверсификация қилиш, ҳудудларнинг мавжуд табиий ва иқтисодий ресурсларидан унумли фойдаланган ҳолда озиқ-овқат саноатини ривожлантиришнинг стратегия ва моделлари, озиқ-овқат саноатида халқаро стандартларни кенг жорий этиш, шунингдек, қишлоқ хўжалиги ва озиқ-овқат маҳсулотларининг экспорт географияси бўйича батафсил маълумот берилди.

Курниаван Закария, ўз навбатида, компания фаолияти тўғрисида тўхталиб, ҳозирда Малайзия томони жаҳоннинг 23 давлатидаги экспортёр корхоналар билан ҳамкорлик қилаётганини билдирди.

- Компаниямиз қишлоқ хўжалиги ва озиқ-овқат маҳсулотларини Малайзияга етказиб бериш бўйича Ўзбекистоннинг салоҳиятли ишлаб чиқарувчи ва экспортчи корхоналари билан ҳамкорлик қилишдан манфаатдор, – деди у. – Биз Ўзбекистондан кенг турдаги қишлоқ хўжалиги маҳсулотлари ва бошқа озиқ-овқат маҳсулотлари, заргарлик ва чинни буюмларни импорт қилишга тайёрмиз.

Учрашув якунида Малайзия компанияси ва мамлакатимизнинг тегишли ташкилотлари ҳамда тадбиркорлик субъектлари ўртасида ҳамкорлик истиқболларини муҳокама қилиш мақсадида онлайн музокаралар уюштириш тўғрисида келишиб олинди.