Молдованинг ЕИга қўшилиши бўйича референдум Тирасполсиз ўтади

Аввалроқ Молдова президенти Майя Санду ўз мамлакати тан олинмаган Днестрбўйи билан бирга 2030 йилгача Европа Иттифоқига қўшилиши мумкинлигини тан олган эди.

Фото: newsmaker.md

Молдованинг Европа Иттифоқига қўшилиши бўйича референдумни Днестрбўйи ҳудудида ташкил қилиш мумкин эмас, чунки бу минтақа Молдова ҳукумати томонидан назорат қилинмайди. Бу ҳақда Молдова президенти Майя Санду 27 декабр, чоршанба куни Руминиянинг Veridica нашрига берган интервюсида айтиб ўтди.

«Днестрбўйи минтақаси ҳудудида сайлов участкаларини очиб бўлмайди, чунки у конституциявий органлар томонидан назорат қилинмайди», - деди Санду. Унинг таъкидлашича, Днестрнинг чап қирғоғи аҳолиси ўнг қирғоқдаги сайлов участкаларига келиши мумкин.

Санду 2022 йил март ойида Молдованинг Европа Иттифоқига қўшилиши ҳақидаги аризани имзолади. Бир неча ой ўтгач, Кишинёв Европа Иттифоқига аъзоликка номзод мақомини олди. 2023 йил 14 декабрда икки кунлик саммит якунлари бўйича Европа кенгаши Молдова билан Европа Иттифоқига қўшилиш бўйича музокараларни бошлашга қарор қилди.

24 декабр куни Майя Санду парламентдан 2024 йил кузида Европа Иттифоқига аъзолик бўйича миллий референдум ўтказишни сўради. Президент Молдова 2030 йилгача тан олинмаган Днестрбўйи билан бирга Европа Иттифоқига қўшилиши мумкинлигини тан олди, аммо бу минтақа ҳозирда Кишинёв томонидан назорат қилинмайди. Шу билан бирга, ЕИ аъзолик Днестрбўйисиз амалга ошиши мумкинлигини истисно қилмади.