«112» тезкор рақами ўз муддатида ишга тушмади

Президент Шавкат Мирзиёев 2023 йилнинг 28 июл куни Фарғона шаҳрида Ички ишлар вазирлигининг кенгайтирилган ҳайъат йиғилишини ўтказиб, тегишли вазирликларга жиноятчиликнинг олдини олишга қаратилган қатор топшириқлар берганди.

Жумладан, президент томонидан Ички ишлар вазирлиги (Пўлат Бобожонов) ва Рақамли технологиялар вазирлиги (Шерзод Шерматов) олдига аҳолининг барча тезкор ва шошилинч хизматларга мурожаатларини оператив ҳал қилиш мақсадида ягона «112» тезкор рақами ва диспетчерлик тизимини ишга тушириш вазифаси қўйилган эди.

Ҳайъат йиғилишида ушбу тизим 2024 йил 1 январдан Тошкент шаҳрида, 1 июлга қадар водий вилоятларида, келаси йил якунига қадар эса барча туман ва шаҳарларда ишга туширилиши шартлиги белгиланган.

Тошкент шаҳри (кейинчалик бошқа ҳудудлар)даги барча қисқа рақамли тезкор навбатчилик - 101, 102, 103, 104, 1050, 1055 хизматлари Ягона вазиятлар марказига жамланади ҳамда умумий «112»-навбатчилик хизмати доирасида фаолияти ташкил этилиши кўзда тутилганди.

Бироқ янги йилнинг 5 куни ўтди ҳамки Тошкент шаҳрида «112» тезкор рақами ҳамда диспетчерлик тизими ишга туширилмади.

Бугунги кун ҳолатига «112» қисқа рақами «мавжуд бўлмаган рақам» сифатида турибди.

Ички ишлар ва Рақамли технологиялар вазирликлари ҳозирча топшириқ ижроси нега кечикаётгани, тизим қачон ишга туширилиши бўйича расмий изоҳ бермаган.