Пентагон раҳбари касалхонада саратондан даволанаётгани маълум бўлди

Оқ уй расмийларига кўра, АҚШ президенти Жо Байден бир ҳафтадан кўпроқ вақт олдин касалхонага ётқизилган 70 ёшли Пентагон раҳбари Ллойд Остиннинг саратон ташхиси ҳақида 9 январ, сешанба куни эрталаб билган. «Бугун эрталабгача Оқ уйда ҳеч ким вазир Остинда саратон борлигини билмас эди», деди сешанба куни тушдан кейин Миллий хавфсизлик кенгашининг алоқа бўйича директори Жон Кирби. Бу шуни англатадики, Байден Остин касаллиги ҳақида жамоатчиликдан бир неча соат олдин хабар топган.

Оқ уй вакили айтишича, Байден ўз вазирининг саратонга чалингани факти яширилгани ҳақидаги хабарга ғазаб билан муносабатда бўлган. «Бундай бўлмаслиги керак», дея АҚШ президентининг сўзларини келтирган Жон Кирби. Унга кўра, Байден ҳукуматда бундай ҳолатлар бўйича тартиб қайта кўриб чиқилишини истаяпти. Вазирликларга тегишли хат аллақачон юборилган. «Бундай воқеа бошқа такрорланмаслигига ишонч ҳосил қилишимиз керак, - деди Кирби. - Вазирлар маҳкамасининг ҳар бир аъзоси бу лавозим имкон қадар шаффоф бўлиш масъулиятини юклашини билади».

Президент Мудофаа вазирига тезроқ тузалиб кетишини тилайди, деди Кирби. Байден Остин билан 2025 йил бошида тугайдиган ваколат муддатининг охиригача қолишни режалаштиряптими, деган саволга, Кирби: «Ҳа» деб жавоб берди. 

Пентагон Остиннинг соғайиш истиқболлари ҳақида хабар берди

Аввалроқ Пентагон АҚШ мудофаа вазири Ллойд Остин саратон туфайли касалхонада даволанаётганини маълум қилиб, вазирнинг касаллиги дастлабки босқичда аниқлангани ва унинг тузалиб кетиш истиқболлари «аъло даражада» эканини маълум қилган эди. Маълум бўлишича, Остин янги йилдан бери касалхонада.

Бундан ташқари, Вашингтон яқинидаги Уолтер Рид ҳарбий ҳоспиталининг ваколатхонаси хабарида айтилишича, Пентагон раҳбарига декабр ойи бошида саратон ташхиси қўйилган. Рождество арафасида Остин минимал инвазив жарроҳлик амалиётини ўтказди. Вазир «операциядан ҳеч қандай муаммосиз тикланиб, эртаси куни эрталаб уйига қайтди», дейилади хабарда. 

Аммо янги йил куни вазир касаллик асоратлари туфайли яна касалхонага ётқизилди. Дастлабки текширувда пешоб йўллари инфекцияси аниқланган ва 2 январ куни у жонлантириш бўлимига ўтказилган. Шундан сўнг, шифокорларнинг таъкидлашича, Остин тузалиб кетди ва унинг «тўлиқ тикланиши» кутилмоқда, аммо бу жараён узоқ давом этиши мумкин. «Вазир Остин касалхонада бўлган пайтида ҳушини йўқотмади ёки умумий беҳушликда бўлмади», дея маълумот берган касалхонада. 

Республикачилар Остинни истеъфога чиқишга чақирди

Остиннинг касаллиги билан боғлиқ бир неча кунлик ноаниқлик мухолифатдаги республикачилар кескин танқидига сабаб бўлди. Бир қатор сиёсатчилар мудофаа вазири истеъфосини талаб қилмоқда. Улар Россиянинг Украинадаги уруши ва Яқин Шарқдаги кескин вазият ҳолатида идора бошлиғининг йўқлигида Пентагонни ким бошқараётганини тушунмаяпти.

Қўшма Штатларда жамоатчилик юқори лавозимли сиёсатчиларнинг соғлиғи ҳақида тўлиқ маълумот олиши одат тусига кирган. 

Ллойд Остин 2021 йилда ваколат муддати бошланганидан бери Байден жамоаси аъзоси. У Пентагонга раҳбарлик қилаётган биринчи афроамерикалик бўлди. 2016 йилгача АҚШнинг амалдаги мудофаа вазири Яқин Шарқда жойлашган АҚШ кучлари қўмондони бўлган. Бу лавозимда у АҚШнинг Ироқ, Сурия ва Афғонистондаги миссиялари учун масъул эди. АҚШ армиясидаги 40 йилдан ортиқ фаолиятининг бошида Остин Германияда хизмат қилган.