“Тошкентдаги аксарият бинолар экологик экспертиза хулосаси олинмасдан қурилади” – экофаол

“Дарахт кесилиши керакми, кесиляпти. Минг афсуски, шу кесилишга хулоса ҳам берилади, ўрнига 10 та ёки 100 та дарахт экиш керак, у ер обод қилиниши керак, деб тавсиялар берилади. Аммо буни хеч ким назорат қилмайди. Экологик экспертиза хулосалари жуда қатъий, агар унга амал қилинадиган бўлса, шаҳарда бу даражада бетартиб бинолар қурилмас эди”. Экофаол Бунёдбек Абдуллаев Тошкентнинг экоинқирозга кириб қолиши сабаблари ҳақида гапирди.

Абдуллаевга кўра, республика экологик экспертиза марказининг қурилишларга қўйиладиган талаблари илмий асосда ишлаб чиқилган. Халқаро экспертлар томонидан ҳам тасдиқланган. “Лекин жуда кўп қурилишлар олдин лойиҳани тасдиқлатиб олади-да, экологик экспертизадан хулоса олмасдан қурилишни бошлаб юборишади”,– дейди экофаол.

“Кейин охирида бинога кадастр олаётганда экспертизани оламан деб ўйлашади, лекин Тошкентда қурилаётган жуда кўп биноларни суриштирсангиз, экологик экспертиза хулосаси олмасдан бошланган бинолар ҳисобланади. Экологик экспертиза хулосалари жуда қатъий, агар унга амал қилинадиган бўлса, шаҳарда бу даражада бетартиб бинолар қурилмас эди.

Экологик қонунбузарликлар содир этилганда ўша вақтда фақат Маъмурий жавобгарлик тўғрисидаги кодекснинг 38 та моддаси билан жавобгарликка тортилиш белгиланган эди. Бу – фақат маъмурий, фақат жарималар. Бир йил ичида экологик қонунбузарликлар қайта-қайта содир этилганда жиноий жавобгарликка тортилади. Ҳозир кейинги пайтда қизил китобга киритилган ҳайвонларни овлаш ёки бошқа қатор экологик жиноятлар содир этганда бирданига жиноий жавобгарлик белгилаш, жазо чораларини кучайтириш белгиланиб бориляпти. Лекин бу ҳам қайсидир маънода экологик жиноятларни тўхтатиб қолаётгани йўқ”,– дея қайд этади Бунёдбек Абдуллаев.

Унинг қўшимча қилишича, давлат ўзи буюртмачи бўлган объект қурилишларида экологик масалалар иккинчи даражали бўлиб қолмоқда.

“Йўл қурилиши, метро қурилиши, айниқса ижтимоий объектлар – давлат ўзи буюртмачи бўлган объектлар бор. Бундай вақтда экологик масалалар иккинчи даражали бўлади. Метро тушиши керакми, тушиши керак. У ерда дарахт кесилиши керакми, кесиляпти. [Шунга] гувоҳ бўляпмиз. Лекин минг афсуски, шу кесилишга хулоса қандай берилади, ўрнига 10 та ёки 100 та дарахт экиш керак, у ер обод қилиниши керак деб тавсиялар берилади. Айтмоқчиманки, экологик йўналишда олиб борилаётган ишларда ҳали йўлнинг бошида ҳам, охирида ҳам эмасмиз. Буни доимий такомиллаштириш керак”,– деди у.

Шунингдек, Абдуллаев бу жараёнда экология вазирлиги ёки бошқа тегишли ташкилотларнинг таъсир чорасини ошириш лозимлигини, бу йўналишида фаолият олиб бораётган инспекторларнинг таъсир кучи ҳудудларда жуда пастлигини айтиб ўтди.