Apple Россияда 1,2 миллиард рубл миқдорида жарима тўлади

АҚШ корпорацияси iOS-иловалари ишлаб чиқувчилари учун бир қатор тақиқлар билан монополияга қарши қонунларни бузди, дея тушунтирди Монополияга қарши федерал хизмат.

Американинг Apple корпорацияси Россияга 1,2 миллиард рубл миқдорида жарима тўлаган. Бу ҳақда 22 январ, душанба куни Россия Монополияга қарши федерал хизмати (ФАС) маълум қилди. Департаментнинг таъкидлашича, пул аллақачон Россия Федерацияси бюджетига ўтказилган.

2022 йил июл ойида ФАС Apple компаниясини монополияга қарши қонунларни бузган деб топди. Корпорация iOS-илова ишлаб чиқувчиларга илова ичида мижозларни App Store'дан ташқари харидлар учун тўловни амалга ошириш ва муқобил тўлов усулларидан фойдаланиш ҳақида хабардор қилишни тақиқлади, дея тушунтирди Россия агентлиги. Натижада бош қароргоҳи Калифорнияда жойлашган компания 1,17 миллиард рубл миқдорида жаримага тортилди.

Россиядаги жорий жарима 2022 йил март ойида Украинага ҳужум муносабати билан Россия Федерациясида расмий сотувларни тўхтатган Apple учун биринчиси эмас эди. 2022 йил июл ойида Москва суди корпорацияни россиялик фойдаланувчиларнинг маълумотларини маҳаллийлаштиришдан бош тортгани учун 2 миллион рубл миқдорида жаримага тортди. 2023 йил февралида Америка компанияси Касперский лабораторияси билан боғлиқ монополияга қарши иш бўйича Россия бюджетига 906 миллион рубл тўлаган. Ўша йилнинг август ойида Москва суди Apple компаниясини Россияда тақиқланган маълумотларни, хусусан, Украинадаги уруш ҳақидаги «нотўғри маълумотлар»ни ўз ичига олган иловалар ва подкастларни олиб ташламагани учун 400 минг рубл миқдорида жаримага тортди.