Тошкентдаги хонадонлардан бирида Туркистон оқ лайлаклари сақланаётганлиги аниқланди

Хонадон эгаси Ўзбекистон Қизил китобига киритилган лайлакларни ўтган йилнинг ёзида Сирдарё вилояти ҳудудида қанотлари синган ҳолда топиб олганлигини ҳамда парвариш қилиб келаётганлигини билдирган.

Фото: Экология вазирлиги

Тошкент шаҳрининг Олмазор туманидаги хонадонлардан бирида лайлак сақланаётганлиги маълум бўлди. Бу ҳақда Экология вазирлиги хабар қилди.

Маълум қилинишича, Тошкент шаҳар Экология бошқармаси Олмазор тумани бўлими инспекторлари томонидан навбатдаги рейд тадбири ўтказилган. Рейд давомида тумандаги Гуручариқ маҳалласи хонадонларининг бирида Ўзбекистон Қизил китобига киритилган 1 жуфт Туркистон оқ лайлаклари сақланаётганлиги аниқланган.

Ҳолат юзасидан ўрганиш ишлари олиб борилган. Фуқаро Б.А. қушларни ўтган йилнинг ёз ойида Сирдарё вилояти ҳудудида қанотлари синган ҳолда топиб олганлигини ҳамда уларга ёрдам кўрсатиб, парвариш қилиб келаётганлигини билдирган.

Фуқарога ёввойи, шунингдек, Ўзбекистон Қизил китобига киритилган жонзотларни уйда ноқонуний сақлаш мумкин эмаслиги тушунтирилган ҳамда оқ лайлаклар табиат бағрига қўйиб юборилган.

Олдинроқ Ўзбекистон Қизил китобига киритилган ҳайвонларни йўқ қилганлик учун жарималар миқдори 10 бараварга оширилгани хабар қилинганди.