Украина қуролли кучлари Бош штаби тасдиқлашича, украин армияси ва разведка хизмати РФ Қора денгиз флотининг «Цезар Куников» катта десант кемаси чўктириб юборилган. «Зарба берилган вақтда у Алупки яқинида, Украина ҳудудий сувларида эди», — дейилади Бош штаб баёнотида. Кема йўқ қилингани ҳақида дастлаб «Украинская правда» Украина мудофаа вазирлигининг Бош разведка бошқармасидаги манбасига таяниб хабар берганди. Нашр суҳбатдоши бу разведкачилар ўтказган амалиёт бўлгани ва ҳужум натижасида кема чўкиб кетганини айтган. Украинадаги «Кримский ветер» телеграм-канали гувоҳлар томонидан олинган видеоларни жойлаштирган: улардан бирида денгизда нимадир ёнаётгани, бошқаларида сув устида вертолётлар учаётгани акс этган.
Украина разведкаси «Цезар Куников» кемасига ҳужум қилиниши кўрсатилган видеони намойиш этди. Видеоёзувда бир вақтнинг ўзида бир нечта денгиз дронлари кемага ҳужум қилаётгани, ташқи белгиларига кўра у «Цезар Куников» ҳам мансуб бўлган 775-проектдаги йирик десант кемаси эканини кўриш мумкин. Видео ўрталарида портлаш акс этади, охирида эса кема бир томонга оғаётгани кўринади.
Бош разведка бошқармасидагилар кемага Magura V5 русумли денгиз дронлари ҳужум қилганини маълум қилган. «Якунда „Цезар Куников“нинг чап томонида критик тешиклар пайдо бўлди ва у чўка бошлади», — дея хабар берган украин разведкаси. Бошқарма вакиллари қидирув-қутқарув амалиёти «муваффақият келтирмагани»ни таъкидлаган.
Ҳужум вақтида кемада қанча одам бўлгани номаълум. Очиқ маълумотларга кўра, «Цезар Куников» экипажи 87 кишини ташкил этади. «Кримский ветер» телеграм-канали гувоҳларга асосланиб хабар қилишича, кемага ҳужумдан кейин ҳалок бўлган ва ярадор денгизчилар тиббиёт автобусларида Севастополга етказилган, уларга йўл-патрул хизматининг кўплаб машиналари ҳамроҳлик қилган. Аннексия қилинган Қрим ва Севастопол расмийлари бу маълумот юзасидан изоҳ бермаган.
Россияликларнинг «Два майора» телеграм-канали эса «экипажнинг барча аъзолари тирик» экани ҳақида ёзган. Z-блогерлар рўй берган ҳолат масъулиятни Қора денгиз флоти раҳбарияти зиммасига юкламоқда, «Военний осведомител» канали муаллифи шу раҳбарият туфайли флот кемалари «ҳамон таҳдидларга мос равишда ҳимояланмагани ва каклик каби ўққа тутилаётгани»дан норозилик билдирган.
