Жаҳон банкининг 2023 йил якунлари бўйича эълон қилинган «Аёллар, бизнес ва қонун индекси» ҳисоботига кўра, Ўзбекистон 48 поғонага юқорилаб, 82,5 балл билан 190 та давлат орасида 91-ўринни эгаллади.
Рейтингдаги ўринни яхшилаш мақсадида мазкур масала парламент назоратига ҳам олинган эди. Ушбу масала Сенат Кенгаши мажлисларида муҳокама қилиб борилди, тегишли қарорлар қабул қилиниб, зарур чора-тадбирлар белгиланди.
Бугун мамлакат мазкур индексда Ўзбекистон хотин-қизлар ҳуқуқлари ва гендер тенглик бўйича муҳим ислоҳотларни амалга оширган 5 та давлат қаторига киритилди. Хусусан, давлат раҳбари бошчилигида Ўзбекистонда амалга оширилган 4 та муҳим ҳуқуқий ислоҳот индекснинг «Меҳнатга ҳақ тўлаш» ва «Оила» индикаторларидаги кўрсаткичларига ижобий таъсир кўрсатиб, максимал 100 баллдан баҳоланди.
Жумладан:
- тенг қийматли меҳнат учун эркаклар ва аёлларга тенг миқдорда ҳақ тўланишини кафолатловчи қоидалар қабул қилинди;
- саноатда аёллар меҳнатидан фойдаланишга қўйилган чекловлар бекор қилинди;
- саноатда аёллар меҳнатидан фойдаланишга қўйилган чекловлар бекор қилинди;
- ноқулай меҳнат шароитларига эга ёки хавфли бўлган тармоқларда аёлларга эркаклар каби меҳнат қилиш имконияти яратилган;
- аёлларни оиладаги зўравонликдан ҳимоя қилиш чоралари кучайтирилди.
Ҳисоботда Ўзбекистон Сингапур, Туркия ва БАА билан бир хил балл тўплаб, Марказий Осиёда энг яхши натижа кўрсатган мамлакат сифатида эътироф этилди.