Россия АЭХАнинг Запорижжя АЭСни Киевга қайтариш ҳақидаги чақириғини рад этди

Запорижжя атом электр станциясини Украинага ёки халқаро назоратга ўтказиш ҳақидаги чақириқлар Москвада «Россия суверенитети ва ҳудудий яхлитлигига тажовуз» сифатида баҳоланмоқда», дейилади ТИВ хабарида.

Фото: Dmytro Smolyenko/Ukrinform/abaca/picture alliance

Россия Атом энергияси бўйича халқаро агентликнинг (АЭХА) Запорижжя атом электр станциясини зудлик билан Украина назоратига қайтариш ҳақидаги чақириғини рад этди. «Запорижжя АЭСни Украинага «қайтариб бериш» ёки у устидан халқаро назорат ўрнатишга чақирувчи ҳар қандай резолюциялар, шунингдек, расмийлар ва халқаро ташкилотларнинг баёнотлари биз учун давлат суверенитети ва ҳудудий яхлитлигига тажовуз қилишга уриниш сифатида баҳоланади», - дейилади Россия Ташқи ишлар вазирлиги 13 март, чоршанба куни эълон қилган баёнотда.

Хабарда, шунингдек, Россия «Украинанинг уни бузишига йўл қўймаслик учун Запорижжя АЭС ва Энергодар шаҳрини ҳимоя қилишни кучайтиришда» давом этиши айтилади.

Россия ҳаракатларини қораловчи АЭХАнинг тўртинчи резолюцияси

АЭХА бошқарувчилар кенгаши 7 март куни кўпчилик овоз билан тегишли резолюцияни қўллаб-қувватлади. «Ҳужжат, хусусан, Россияни Запорижжя АЭС ҳудудидан зудлик билан барча рухсат этилмаган ходимларни, шу жумладан ҳарбий хизматчиларни олиб чиқиб кетишга ва Украина Давлат ядро назорати инспекцияси томонидан берилган мавжуд лицензияга мувофиқ станцияни зудлик билан Украина ваколатли органларининг тўлиқ назоратига қайтаришга чақиради», - деб хабар қилди Украина Энергетика вазирлиги.

Қабул қилинган ҳужжатда, шунингдек, Запорижжя АЭСда ядро хавфсизлигининг беқарор ҳолатидан жиддий хавотир билдирилган. Хусусан, таъкидланганидек, бу малакали кадрлар етишмаслиги, режалаштирилган профилактика ишларини бажаришдаги камчиликлар, сув ва электр таъминоти тизимларининг заифлиги, шунингдек, Запорижжя АЭСнинг ички ва ташқи периметри ўртасидаги буфер зонада пиёдаларга қарши миналар ўрнатилиши билан боғлиқ.

Бу АЭХА бошқарувчилар кенгашининг Украина ядровий иншоотларига қарши Россия ҳаракатларини қораловчи тўртинчи резолюциясидир. АЭХА маълумотларига кўра, сўнгги 18 ой ичида Запорижжя АЭС саккиз марта ташқи электр таъминотидан узилган ва фавқулодда дизел генераторлари ёрдамида ишлаган.

Россия қўшинлари 2022 йил 4 март куни Запорижжя атом электр станциясини эгаллаб олди. ЗАЭС Европадаги энг йирик атом электр станцияси бўлиб, умумий қуввати 6 гигаватт бўлган 6 та энергетика блокига эга. Россия 2022 йил сентябр ойида Запорижжя вилоятининг бир қисмини эгаллашга муваффақ бўлди.