Минглаб британияликларга қон қуйишда юқтирилган касалликлар учун товон пули тўланади

Собиқ судя Брайан Лангстафф бошчилигидаги терговга кўра, Британияда 1970-1990-йиллар оралиғида одам иммунитет танқислиги вируси (ОИВ) ёки гепатит C бўлган қон ёки қон таркибий қисмларини қуйиш орқали 30 000 киши касалланган. Ҳисобот 20 май, душанба куни эълон қилинди.

Хабарда айтилишича, 1250 га яқин киши, жумладан, 380 нафар бола ОИВ инфекциясини шу йўл билан юқтирган ва уларнинг тўртдан уч қисми вафот этган. Бундан ташқари, 5000 кишида касалланган қонни қуйиш натижасида сурункали гепатит C, жигарнинг оғир касаллиги ривожланди. Улардан баъзилари аллақачон вафот этган. 

Текширув натижасида маълум бўлишича, ишлатилган донорлик қонининг бир қисми касалланган беморлардан олинган. Ишлаб чиқарувчилар турли донорларнинг плазмасини аралаштиришлари сабабли, битта ифлосланган намуна қоннинг бутун партиясини ифлослантириши мумкин. Британия тиббиёт амалдорлари қонунбузарликлар ҳақида билишган, аммо уларни йиллар давомида яширган, шу жумладан беморларга касаллик юқтирилганини айтмаган. 

Якуний ҳисобот 2527 саҳифани ўз ичига олади. Тергов доирасида 5 мингдан ортиқ гувоҳ сўроқ қилинди, 100 мингга яқин ҳужжат таҳлили ўтказилди. 

Сунак жабрланувчиларга товон пули ваъда қилди 

Британия бош вазири Риши Сунак Лангстафф комиссияси ҳисоботи эълон қилинганидан кейин «жуда афсусда» эканлигини айтди. Унинг сўзларига кўра, бу ўнлаб йиллар давомида Британия соғлиқни сақлаш тизимининг турли даражаларида - шифокорлардан тортиб ҳукуматлардаги вазирларгача бўлган «маънавий муваффақиятсизлигидир». 

Сунак қон қуйишдан касалланган қурбонлар ва уларнинг оила аъзоларига пул компенсацияси тўлашга ваъда берди. Бунинг учун бюджетдан 10 миллиард фунт стерлинг (тахминан 11,7 миллиард евро) ажратилади. Дастур тафсилотларини яқин орада Британия ҳукумати котиби, бош ғазначи Жон Гленн эълон қилади.