«Мен кетмайман. Бу пойгада охиригача бўламан». Байден номзодини қайтариб олмаслигини маълум қилди

АҚШ президенти Жо Байден ўз тарафдорлари билан телеконференция вақтида дебатда Доналд Трампга мағлуб бўлганига қарамай, президентлик сайловларида қатнашиш ниятида эканини айтди, деб хабар беради CBS ўз манбасига таяниб.

«Буни аниқ, соддароқ ва тушунарли қилиб айтишга ижозат беринг: мен қатнашаман. Мен Демократик партия номзодиман. Ҳеч ким мени чиқариб юбора олмайди. Мен кетмайман», — дея Байденнинг сўзларини келтирган телеканал суҳбатоши.

Телеконференция чоғида президент дебатда муваффақиятсиз иштирок этганини тан олган, аммо, CBS манбаси қайд этишича, ҳозирда унинг кампанияси рўй берган ҳодиса оқибатларини юмшатишга қаратилган.

NRP нашри ёзишича, партия тарафдорларига юборилган электрон мактубда ҳам Байден пойгадан «чиқмаслиги»ни таъкидлаган. «Мен бу пойгада охиригача қоламан ва биз бу сайловларда ғолиб чиқамиз», — дейилади мактубда.

Бундан ташқари, АҚШ президенти 3 июл куни демократ губернаторлар билан учрашиб, сайловлардаги иштироки давом этиши борасидаги хавотирларни аритишга уринган. Reuters агентлиги ёзишича, учрашувда қатнашган Ню Йорк, Миннесота ва Мэриленд губернаторлари Байден номзодини қўллашини билдирган.

«Бугун биз бу ерда аввалбошдан ўзимиз ишонган ва  Доналд Трампни енгишга қодир бўлган йигитни кўрдик», — деган Миннесота губернатори Тим Уолц учрашувдан кейин.

«Президент доимо бизни қўллаб-қувватлайди. Биз ҳам уни қўллаймиз», — дея қайд этган Мэриленд губернатори Уэс Мур.

• Жо Байден ва Доналд Трамп ўртасидаги дебат 28 июнга ўтар кечаси бўлиб ўтганди ва кўплаб сайловчилар фикрича, у амалдаги президент учун муваффақиятсиз кечган. Шундан кейин Байденнинг тарафдорлари у партиянинг бошқа номзоди фойдасига сайловни тарк этиши кераклиги ҳақида ўйлай бошлади. Президент штаби эса у пойгадан чиқмаслигини маълум қилди. Байденнинг ўзи ҳам сайловда иштирок этиб, ғалаба қозониш ниятида эканини билдирди.
• Америка нашрлари Байден бу масалада қарор қабул қилишда ўз оиласи аъзолари фикрига таяниши, хусусан унинг турмуш ўртоғининг фикри ҳал қилувчи бўлишини ёзишди. Нашрларнинг айрим манбалари эса Жилл Байденни «президентга тўлиқ таъсир кўрсата оладиган ягона шахс» деб аташган.
• 3 июл куни The New York Times газетасида эълон қилинган мақолада ёзилишича, Байден ўзининг муҳим тарафдорларидан бирига гўёки президент яқин одамларидан бирига ўзининг сайловдаги иштироки ёмон якунланиши мумкинлигини тушунишини ва сайловда курашни давом эттириш-эттирмаслик бўйича ўйловда қолганини айтган. Кўп ўтмай Оқ уй бу маълумотни «буткул ёлғон» деб баҳолади.