Ўзбекистон ва Таиланд товар айирбошлаш ҳажмини 500 млн долларга етказмоқчи

Ўзбекистон инвестициялар, саноат ва савдо вазири ўринбосари вазифасини вақтинчалик бажарувчи Шоҳрух Ғуломов Таиланд Ташқи ишлар вазирлиги доимий котиби ўринбосари Бусади Сантипитакс бошчилигидаги делегация билан учрашув ўтказди.

Инвестициялар, саноат ва савдо вазирлигига кўра, делегация таркибида Таиланднинг йирик компаниялари раҳбарлари бор эди.

Таиланд томонига Ўзбекистон фуқаролари учун 60 кунгача визасиз режим тақдим этгани учун миннатдорчилик билдирилди.

Ижобий натижалар икки давлат ўртасидаги ўзаро товар айирбошлаш ҳажмининг ўсиш суръатларини кўрсатмоқда – жорий йилнинг биринчи ярмида ўзаро товар айирбошлаш ҳажми 170 фоизга ошди. Яқин келажакда қўшма инвестиция лойиҳалари сонини кўпайтириш ва товар айирбошлаш ҳажмини 500 миллион АҚШ долларига етказиш бўйича чора-тадбирлар кўриш муҳимлиги қайд этилди.

Учрашув якунида савдо-иқтисодий ва сармоявий ҳамкорликни ривожлантириш бўйича қўшма чора-тадбирлар режасини ишлаб чиқиш, шу жумладан, қишлоқ хўжалиги, туризм, озиқ-овқат саноати, тўқимачилик ва электротехника маҳсулотларини ишлаб чиқиш каби соҳаларда қўшма лойиҳаларни амалга ошириш бўйича келишувларга эришилди.