Литва ўз ҳудудида миналар ишлаб чиқаришни режалаштирмоқда

Литва ўзининг миналар ишлаб чиқариш қувватини ошириш ниятида ва ўз ҳудудида миналар ишлаб чиқариш имкониятини кўриб чиқмоқда. 

Бу ҳақда мамлакат мудофаа салоҳиятининг ривожланишига изоҳ берар экан, мудофаа вазири Лауринас Кашчюнас маълум қилди, деб ёзади LRT. 

«Энг муҳим ва ресурсларни кўп талаб қиладиган, лекин айни пайтда энг самаралиси бу мина салоҳиятини ривожлантириш, мустаҳкамлашдир», деди Кашчюнас ҳукуматдаги матбуот анжуманида. 

Унинг сўзларига кўра, Литва ҳозирданоқ миналарни сотиб олмоқда ва келгуси йилда буни давом эттиришни режалаштирмоқда. Ўн йил ичида 600 миллион евро маблағни, асосан, миналарга сарфлаш режалаштирилган. 

«Асосий эътибор қуруқликдаги танкларга қарши миналарни, шунингдек, кемаларга қарши миналарнинг ҳар хил турларини сотиб олишга қаратилган, чунки гап нафақат қуруқлик миналари ҳақида, балки денгиз миналари ҳақида ҳам кетяпти», - дея қўшимча қилиб ўтди идора раҳбари.

Вазир, шунингдек, Литва маҳаллий корхоналар билан мамлакатда миналар ишлаб чиқариш имконияти бўйича музокаралар олиб бораётганини таъкидлади. 

«Биз саноатимиз билан Литва минасини яратиш имкониятини муҳокама қилмоқдамиз, эҳтимол у оддийроқ, аммо самаралироқ бўлади», деди Кашчюнас. 

Вазир, шунингдек, айрим компаниялар бунга тайёр эканини билдиргани ва август ойида Литва миналарини ишлаб чиқариш истиқболларини муҳокама қилиш учун учрашувлар режалаштирилганини айтди.