Давлат думаси Россияда майнингни тартибга солиш тўғрисидаги қонунни қабул қилди

Россия Давлат думаси иккинчи ва учинчи - якуний ўқишларда мамлакатда криптовалюта олиш фаолиятини қонунийлаштириш бўйича қонунни қабул қилди. Бу ҳақда 30 июл, сешанба куни парламент қуйи палатаси сайтида маълум қилинди. 

«Биз криптовалюталарни санкцияларни четлаб ўтиш воситаси ва юқори технологияли экспорт нуқтаси сифатида кўрамиз», деди қонун лойиҳаси ҳаммуаллифи Антон Горелкин. У Россия майнинг ҳажми бўйича АҚШдан кейин дунёда иккинчи ўринда эканлигини таъкидлади. 

Рақамли валютани майнинги билан шуғулланадиган жисмоний ва юридик шахсларга қўйиладиган талаблар энди Россия банки билан келишилган ҳолда Россия ҳукумати томонидан белгиланади. Рақамли ривожланиш вазирлиги ушбу талабларнинг бажарилишини назорат қилади. Фақатгина тегишли реестрга киритилган Россия юридик шахслари ва якка тартибдаги тадбиркорлар майнинг учун ҳуқуқ олади. 

Майнинг рекламасини тақиқлаш 

Қонун лойиҳаси, шунингдек, Давлат думаси веб-сайтига кўра, «одамларни жалб қиладиган фирибгарлик схемаларининг ўсиши билан боғлиқ» майнинг рекламасини тақиқлашни таклиф қилади. Бундан ташқари, иқтисодий соҳадаги жиноятлар ва турли оғирликдаги бошқа жиноятлар учун судланганлиги олиб ташланмаган ёки ўталмаган шахсларга ҳам майнинг фаолияти тақиқланади.