Ҳасанбой Дўсматов – икки карра Олимпиада чемпиони!

Ёзги Олимпия ўйинларида Ўзбекистон делегацияси бокс бўйича дастлабки медалини қўлга киритди. 

-51 кг вазнда Ҳасанбой Дўсматов финалда франциялик Билол Беннамага қарши рингга кўтарилиб, 5:0 ҳисобида ғалаба қозонди ва икки карра Олимпиада чемпионига айланди.

Дўсматов турнирдаги иштирокини нимчоракфиналда Пуэрто-Рико вакили Ҳесус Ҳуанма Лопесга қарши жангда ғалаба қозониш билан бошлаганди (5:0), кейин чоракфиналда қозоғистонлик Сакен Бибоссиновга қарши ўта оғир жанг ўтказди (3:2), яримфиналда эса Кабо-Верде вакили Давид де Пина тўсиғидан ўтди (5:0).

Ушбу боксчи Рио-2016 олимпиадасида ҳам тенгсиз бўлганди. 

Бокс бўйича ўсмирлар Олимпиадаси ғолиби, жаҳон чемпиони Абдумалик Халоков ҳам Олимпия ўйинларининг финалига йўлланма олди. -57 кг вазн тоифасида иштирок этаётган спортчи яримфиналда австралиялик Чарли Сениорни мағлубиятга учратди (5:0).

Энди у 10 август куни чемпионлик учун рингга кўтарилади. Унинг олтин йўлидаги сўнгги рақиби ўзбекистонлик мураббий Акмал Ҳасанов ёрдамида иштирок этаётган қирғизистонлик Мунарбек Сейитбек уулу бўлади.

Шу тариқа, яримфиналгача етиб келган ўзбекистонлик 5 нафар боксчининг барчаси ҳал қилувчи босқичга йўл олишди.

Аввалроқ таэквондо бўйича Улуғбек Рашитов ҳам икки карра Олимпия ўйинлари ғолиблигини қўлга киритиб, бу борада биринчи ўзбекистонликка айланганди.

Кун аввалида 45-ўринда турган Ўзбекистон делегацияси Париж-2024даги медалларини 5 тага (3 та олтин, 2 та бронза) етказиб, умумжамоа ҳисобида 18-поғонага кўтарилди.