Муҳаммад Юнус Бангладеш муваққат ҳукумати раҳбарига айланди

Париждан мамлакатга қайтган иқтисодчи, тинчлик бўйича Нобел мукофоти совриндори Муҳаммад Юнус оммавий норозилик намойишларидан сўнг Бангладешда муваққат ҳукумат раҳбари бўлди. 8 август, пайшанба куни кечқурун президент саройида 84 ёшли Юнуснинг қасамёд қилиш маросими бўлиб ўтди. Маросимда у «мамлакат Конституциясини ҳимоя қилишга ҳамда ўзининг янги вазифаларини чин дилдан бажаришга» ваъда берди ҳамда фуқароларни «бутун мамлакат бўйлаб» зўравонликни тўхтатишга чақирди. 

Кейинчалик журналистлар билан суҳбатда Юнус мамлакат «янги ғалаба кунини» кутганини ва «иккинчи мустақилликка эришганини» айтди.

Муҳаммад Юнусни тайинлаш тўғрисидаги қарор Бангладеш президенти Шаҳабуддин Чуппу ва Юнус номзодини илгари сурган «Талабалар дискриминацияга қарши» норозилик ҳаракати етакчилари ўртасидаги учрашувда қабул қилинди. Муваққат ҳукуматнинг якуний таркиби мамлакат сиёсий партиялари билан маслаҳатлашувлардан сўнг аниқланади, дея аввалроқ хабар берган эди давлат раҳбари матбуот хизмати.

6 август куни Чуппу муваққат ҳукумат тузиш учун парламент тарқатиб юборилишини эълон қилди. Бир кун аввал Бангладешда 2009 йилдан бери бош вазир лавозимида ишлаб келган 76 ёшли Шайх Ҳасина норозилик намойишлари остида мамлакатни тарк этган эди. Унинг истеъфоси камида 455 кишининг ўлимига сабаб бўлган бир неча ҳафталик намойишлар ортидан юз берди. Улардан камида 109 нафари 5 август кунги тартибсизликлар қурбони бўлган.

Юнус камбағалларга мўлжалланган микрокредитлар учун Нобел мукофоти олган

Муҳаммад Юнус 2006 йилда «Микрокредитлар орқали иқтисодий ва ижтимоий ривожланишнинг пастдан юқорига» тушунчасини киритгани учун тинчлик учун Нобел мукофотини олган. Юнус томонидан асос солинган Grameen Bank кичик бизнесини ривожлантириш истагида бўлган миллионлаб камбағалларга микрокредитлар ажратди ва шу орқали уларнинг қашшоқликдан қутулишига ёрдам берди. 

Юнуснинг сўзларига кўра, у дастлаб намойишчиларнинг муваққат ҳукуматга раҳбарлик қилиш таклифини рад этган. «Мен уларга ишим кўплигини айтдим. Лекин талабалар қатъий мендан сўрашди. Агар талабалар кўп нарсани қурбон қила олсалар, мамлакат аҳолиси кўп нарсани қурбон қила олса, мен ҳам жавобгарман. Кейин талабаларга айтдим: масъулиятни ўз зиммамга олишим мумкин», деди Юнус.