ЕИда 11 млн евролик қалбаки банкнотлар тайёрлаган шахс ҳибсга олинди

Италия жануби-ғарбидаги Неаполда 11 миллион евролик банкнотларни ишлаб чиқаришда гумон қилинган қалбаки пул ясовчи қўлга олинди. Бу ҳақда 19 август, душанба куни Европа Иттифоқининг полиция хизмати - Европол маълум қилди. 

Операция 14 август куни бўлиб ўтди, ерости босмахонаси демонтаж қилинди. Тергов маълумотларига кўра, эркак 2023 йилда аниқланган ва муомаладан олиб қўйилган барча қалбаки евро банкнотларнинг 27 фоиздан ортиғини муомалага чиқарган. Гап тахминан 8 миллион евро ҳақида кетмоқда. 

Бундан ташқари, муомалага чиқарилгунга қадар бутун Европа бўйлаб тахминан 950 000 евро (асосан 20, 50 ва 100 евро номиналларида) мусодара қилинган. Ниҳоят, Неаполдаги босмахонадан 3 миллион евролик банкноталар олинди.

«Бункерга ўхшаш» ерости босмахонаси топилди 

Тергов фаолияти 2022 йилдан бери ўтказилиб, ўндан ортиқ давлатдан разведка маълумотлари олинган. Италия карабинерлари Европол кўмагида гараждан релсларга ўрнатилган сохта девор билан ажратилган «бункерга ўхшаш» яширин босмахонани топди. 

Эҳтимолий жиноятчи асосан Францияда бир нечта миллий ва трансмиллий тарқатиш каналларидан фойдаланган. Европа Марказий банки томонидан қўллаб-қувватланган эксперт таҳлили банкнотларда (жумладан, голограммаларда) қалбакилаштирилган ҳимоя элементлари юқори сифатга эга эканлигини кўрсатди. 

2023 йилда Германияда муомалада бўлган қалбаки евро купюралар сони кўпайди

Германия Федерал банки (Бундесбанк) маълумотларига кўра, Германияда муомаладаги қалбаки евро банкнотлари сони 2023 йилда чоракдан кўпроққа ошган. Уларнинг сони ўтган йилга нисбатан 28,2 фоизга ортиб, 56 минг 600 тани ташкил этди. 

Қалбаки пул ясовчилар орасида энг машҳур евро банкнот (38 фоиз ҳолларда) 50 евро бўлиб қолди. 20 евролик қалбаки банкнотларнинг улуши 22 фоизни, 200 евроники 15 фоизни ташкил этди.