Беларус Болтиқбўйи давлатларини мамлакатнинг денгизга чиқишини тўсиб қўйганликда айблади

Минск БМТ даражасида денгизга чиқиши тўсиб қўйилгани масаласини қатъий кўтаришни режалаштирмоқда, дея маълум қилди мамлакат ТИВ.

Болтиқбўйи мамлакатлари атайлаб Беларуснинг денгизга чиқиш йўлини чеклади. Бу ҳақда Беларус Ташқи ишлар вазирлиги матбуот котиби Анатолий Глазнинг декабр ойида Ботсванада бўлиб ўтадиган БМТнинг денгизга чиқиш имконияти йўқ ривожланаётган мамлакатлар бўйича 3-конференциясида Беларус иштироки режалари ҳақидаги саволга жавобида айтилган.

20 август, сешанба куни вазирлик матбуот хизмати дипломатнинг сўзларидан иқтибос келтиришича, БМТ даражасида Беларус ўзининг денгизга чиқиш йўли тўсиб қўйилгани масаласини қатъий равишда кўтаришни режалаштирмоқда.

Глаз Бирлашган Миллатлар Ташкилоти бош котиби Антониу Гутерриш Беларус президентига БМТнинг денгизга чиқиш имкони бўлмаган ривожланаётган мамлакатлар учун 3-конференцияда иштирок этишга таклиф юборганини эслатди.

«Беларус президенти ўзининг жавоб хабарида бизнинг қизиқишимизни тасдиқлади. Бу Беларус ҳам, денгизга чиқиш имкони бўлмаган бошқа мамлакатлар ҳам бир хил муаммоларга дуч келаётгани билан боғлиқ. Биз ҳаммамиз қирғоқ бўйидаги қўшниларимизнинг ҳаракатларига боғлиқмиз. Мамлакат БМТ конвенциясида назарда тутилган денгизга чиқиш ва транзит ҳуқуқини чекловчи бир қатор давлатлар ноқонуний хатти-ҳаракатлари оқибатларини тўлиқ бошдан кечирмоқда», — деди дипломат.

Шу муносабат билан Минск ушбу конференцияда Ташқи ишлар вазирлиги раҳбарияти даражасида бевосита иштирок этишни режалаштирмоқда ва биз маълум давлатларни мавжуд ҳуқуқий ҳужжатлар доирасида халқаро мажбуриятларини бажаришга мажбурлаш масаласини қатъий кўтариш ниятидамиз, деди Глаз.

Беларус ўзининг қонуний ҳуқуқларини амалга оширишда дуч келадиган муаммоларни муносиб даражада аниқ кўрсатиш вақти келди, деди ТИВ вакили.