Лвив шаҳри мэри Ондрий Садовой ижтимоий тармоқлардаги саҳифаларида ушбу оила фотосуратини эълон қилган. У суратдагилардан биргина эркак тирик қолганини ёзган.
«Евгения ҳамда уларнинг уч қизи — Ярина, Даря ва Эмилия — ўз уйларида ҳалок бўлишди», — дея ёзган Садовой.
Чоршанбага ўтар кечаси Россия Украина бўйлаб ёпирилма зарба йўллади. Россиялик ҳарбийлар Лвив шаҳри марказига баллистик ракеталар, жумладан, «Кинжал»лар билан ҳужум қилган.
Расмийларга кўра, иккита кучли портлаш рўй берган. Бир неча уй вайрон бўлган, жами 70 дан ортиқ бино шикастланган, шундан кўпчилиги — турар жойлар.
Ракета зарбаси вақтида етти киши ҳалок бўлган, улар орасида бир оиланинг 7, 18 ва 21 ёшлардаги фарзандлари ҳам бор.
Кейинроқ ФВДХ зарба вақтида она ва уч қиз зинапояда бўлгани, ота эса квартирага қайтгани ҳақида хабар қилган.
Фотодаги қизлардан бири Даря Базилевич Украина католик университети талабаси бўлган.
Университетнинг фейсбукдаги саҳифасида қолдирилган ҳамдардлик постида қиз ҳақида маълумотлар келтирилган. У университетнинг гуманитар фанлар факултети «Маданиятшунослик» дастури иккинчи курсида ўқиётганди.
У фаол талаба бўлган, «Кўнгиллилар лабораторияси»да устозлик қилган, театр студиясида шуғулланган, актёрлик санъатини ўрганган.
Унинг опаси — Ярина Базилевич (Ондрий Садовой эълон қилган суратда у энг орқада) — 21 ёшда эди.
У «Лвив — Европа ёшлар пойтахти 2025» офиси дастурлар менежери бўлиб ишлаган. «У Ёшлар маркази ташкил этилганидан буён, кейин эса ТВОРИ! тармоғида биз билан бирга ишлаган» — дейилади Украина католик университети баёнотида.
BBC Украина хизмати мухбири Жанна Безпятчук фожиадан олдинроқ Ярина билан гаплашган, улар ҳамкорлик тўғрисида келишиб олишганди
