Олтинкўл туманида тадбиркорлар оммавий электр токидан узилди. Улар қуёш панелларини ўрнатишга мажбурланяпти

Андижон вилояти Олтинкўл туманидаги дўконлар, дорихоналар, автомобилларга ёқилғи қуйиш шохобчалари, пишириқ цехлари, ўқув марказлари, ишлаб чиқариш корхоналари 7 сентябр куни эрталабдан оммавий равишда электр токидан узиб қўйилди. Бу ҳақда Кun.uz'га туманда фаолият юритадиган тадбиркорлар маълум қилди.

“Бугун соат 9:30-10 лар атрофида свет ўчди. Кейин эшитсам, тумандаги ҳамма тадбиркорлар электр токидан оммавий узилаётган экан. Бизга бу туман прокуратурасининг топшириғига асосан қилинганини айтишди. 10-15 тадбиркор бирга прокуратурага борсак, “бизнинг хабаримиз йўқ”, дейишди. Туман электр тармоқлари корхонасининг айтишича, агар қуёш панелларини ўрнатмасак, свет берилмас экан.

“Қуёш панелларини ўрнатиб, тузилган шартномаларни бизга олиб келиб кўрсатинглар, ток берамиз”, дейишяпти. Энди эрталабдан бери қурби етган, каттароқ тадбиркорлар қуёш панелларини излашга тушиб кетган. Улар-ку амаллаб ўрнатар, лекин менинг бунга ҳозир қурбим етмайди, менда ортиқча пул йўқ ҳозир. Майли, бир ой муҳлат беришсин ўрнатишга, амаллармиз. Лекин ҳозир светни ўчириб, ҳозир ўрнатасан дейиши мантиқсиз. Бизнесни зарарга киритишяпти”, – дейди Kun.uz билан суҳбатлашган тадбиркорлардан бири.

Туман электр тармоқларига мурожаатда пишириқ тайёрлайдиган цехлар музлаткичларда айниб қоладиган маҳсулотлар борлиги, тезроқ электр токини ёқишни сўраган.

“Лекин ҳеч кимнинг муаммосини инобатга олишмаяпти, қуёш панелларини ўрнатишга мажбур қилишяпти”, – дейди яна бир тадбиркор.

Kun.uz ҳолатга аниқлик киритиш учун “Ҳудудий электр тармоқлари” АЖ матбуот хизмати билан боғланди. Компания матбуот котибининг айтишича, бундай мурожаатлар бошқа ҳудудлардан ҳам келиб тушган.

“Лекин огоҳлантиришсиз узилган бўлиши мумкин эмас. Тадбиркорлар қуёш панелларини ўрнатиши керак, бу борада тегишли Ўзбекистон Республикаси президентининг 2023 йил 16 февралдаги “2023 йилда қайта тикланувчи энергия манбалари ва энергия тежовчи технологияларни жорий этишни жадаллаштириш чора-тадбирлари тўғрисида”ги ПҚ-57-сонли, 2024 йил 31 майдаги “Энергия ресурсларидан фойдаланиш самарадорлигини ошириш бўйича қўшимча чора-тадбирлар тўғрисида”ги ПҚ-222-сонли қарорларида назарда тутилган”, – дейди компания матбуот котиби Фаҳриддин Нуралиев

Kun.uz Олтинкўл туман ҳокимлиги матбуот котибига боғланиб изоҳ олишга уринди, лекин бунинг иложи бўлмади.