Англиялик 80 ёшли Питер Глейзбрук ғайритабиий катталикдаги сабзавотлари билан 25 карра Гиннеснинг рекордлар китобига киритилган. Унинг боғида 27,48 килоли гулкарам, 89,7 сантиметрли ловия дуккаги ва 4,98 килоли картошкани учратиш мумкин.
“Ўзим учун доим янги марралар излаб келганман”, — деди у Ноттингҳамдаги уйида Euronews’га берган интервюсида.
Питер бу машғулотни 20 йил олдин, сабзавотлар кўргазмасидан илҳомланиб бошлаган. Кўргазма учун сабзавот етиштирувчилар ўз маҳсулотларининг ташқи кўриниши, шакли ва ҳолатига энг асосий эътиборни қаратишади. Улар учун ҳажм ва оғирлик ҳамма нарсадан устун. Питер ҳам сабзавотлар дунёсига киришга қарор қилган.
Унинг ҳаракатлари муваффақиятли кечди, Питер Гиннеснинг 25 та жаҳон рекордини ўрнатган, ҳозирда улардан олтитасини сақлаб турибди (3,12 кг оғирликдаги энг катта бақлажон ва 63,8 см га 67,7 см ўлчамдаги энг катта ловия барглари)
Қўлида гигант сабзавот кўтариб турган Питернинг суратлари ОАВда тез-тез чоп этилади, аммо бу фақат якуний натижа, холос. Бундай ғайритабиий маҳсулотларни етиштириш учун ойлаб машаққатли меҳнат, маҳорат ва фидойилик талаб этилади.
“Бу менинг ҳаётим, у кўп йиллардан бери шундай”, — деди у.
Гигант сабзавотларни етиштириш фидокорлик талаб этади
Питернинг тушунтиришича, кўп сабзавотларни катта ўлчамли қилиб етиштириш учун уларни узоқ вақт ўстириш керак. Бунинг учун махсус жиҳозлар, жумладан сунъий иситиш ва ёритиш тизимлари, кундалик суғориш ҳамда, албатта, кўп меҳр ва эътибор талаб қилинади.
“Узоқ вақт давомида ҳеч қаерга таътилга боролмайман, чунки сабзавотларга кўз-қулоқ бўлиб туришим керак”, — дейди у.
Буюк Британияда бутун мамлакат бўйлаб турли тадбирлар ўтказилади. Бу тадбирларда Питер ва унинг ҳамкасблари ким энг катта, энг оғир ёки энг узун сабзавотларни етиштирганини аниқлаш учун ўзаро беллашади.
