Испанияда оммавий норозилик намойишлари: аҳоли Валенсия ҳукумати истеъфосини талаб қилмоқда

Испаниянинг Валенсия шаҳрида 130 минг киши иштирокида оммавий норозилик намойишлари бўлиб ўтди. Акция иштирокчилари Валенсия Женералитети (ҳукумат) президенти Карлос Масоннинг истеъфосини талаб қилмоқда.

Марш Валенсия жамоатчилиги, фуқаролик ташкилотлари ва сўл касаба уюшмалари томонидан «Масоннинг истеъфоси» шиори остида ўтказилди. Женералитет саройи қаршисига тўпланган намойишчилар ўз талаблари битилган манифестни ўқиб эшиттирди.

Манифестда айтилишича, Валенсия ҳамжамиятида «сиёсий шармандалик ва инсоният фожиаси тарихидаги энг ёмон эпизод» бошланган. Улар президент Карлос Масоннинг истеъфосини ва унга нисбатан суд жараёнлари бошланишини талаб қилди. Шунингдек, намойишчилар «мураккаб вазиятларда қандай чора кўриш кераклигини билмайдиган Валенсия ҳукумати» истеъфо беришини сўрамоқда.

Митинг иштирокчилари маҳаллий ҳукуматни тўфондан зарар кўрган ҳудудларга фавқулодда вазиятлар бўйича масъул органлар «тушунарсиз сабабларга кўра кеч етиб келганида» айбламоқда. Намойиш иштирокчиларининг сўзларига кўра, Валенсия халқи «беш кунга тақдир ихтиёрига ташлаб қўйилган».

Испанияда кузатилган сув тошқинлари оқибатида ҳалок бўлганлар сони 223 кишига етди. Мамлакат шимол-шарқидаги бутун бошли даҳалар ва қишлоқларни сув босди. Кучли ёғингарчилик ва сув тошқинлари минтақага DANA синфига оид тўфон ёпирилиши оқибатида юз берди. Испания бош вазири Педро Санчес Европа бирдамлик жамғармасидан мамлакатни қайта тиклаш учун маблағ сўради. Испания қиролига Валенсияга ташрифи вақтида лой улоқтиришди. Шунга қарамай, Филипп VI ташрифни давом эттирди ва «фавқулодда вазият туфайли ҳафсаласи пир бўлган кўплаб инсонларнинг ғазабини тушунишини» айтди.