Туск Украинада ўт очишни тўхтатиш санаси ҳақида АҚШдан декларация кутмоқда

Полша бош вазири Доналд Тускнинг фикрича, яқин келажакда Доналд Трамп президентлик сайловларида ғалаба қозонган Қўшма Штатлардан Украинада ўт очишни тўхтатиш муддати ва Киев учун хавфсизлик кафолатлари ҳақида декларациялар олиши мумкин. Полша вазирлар маҳкамаси раҳбарининг сўзлари ҳақида 9 ноябр, шанба куни Полша радиоси хабар берди.

Тускнинг баёноти 6 ноябр куни Трампга яқин бўлган уч манбага таяниб, Украина бўйича режалардан бири ҳақида ёзган The Wall Street Journal мақоласи чоп этилганидан кўп ўтмай янграган. Нашрнинг ёзишича, бу лойиҳа, хусусан, Киевнинг НАТОга камида 20 йил қўшилмасликка ваъда бериши ва бунинг эвазига Вашингтон Россия Федерациясининг кейинги ҳужумларини олдини олиш учун Украинани қурол-яроғ билан таъминлашда давом этишидан иборат.

Ўз навбатида, Тускнинг фикрича, Трампнинг Украина бўйича режалари, эҳтимол, фақат тайёргарлик босқичида.

Полша бош вазири, ўзининг фикрича, кейинги қадамлар қандай бўлиши мумкинлиги ҳақида гапирди. «Бу, албатта, АҚШнинг Украина ишларига камроқ аралашувини ўз ичига олган қарорлар бўлади», дея қўшимча қилди у.

Шу билан бирга, Доналд Туск «Украинадаги уруш бўйича қарорлар нафақат украиналиклар, балки биз билан ҳам маслаҳатлашмасдан қабул қилиниши мумкин эмас», деб таъкидлади.

Трампнинг АҚШдаги сайловлардаги ғалабасидан қатъи назар, Полша ва Европа яқин ойларда ўз хавфсизлиги учун анча катта масъулиятни ўз зиммасига олади, деб ҳисоблайди Полша вазирлар маҳкамаси раҳбари.

Bloomberg: Трамп Украина ва Исроилга нисбатан сиёсатни шакллантирмоқда

Сайланган президент икки ойдан сўнг ўз лавозимига киришади, бироқ у ҳозирданоқ икки қайноқ йўналишда: Исроил ва Украинада АҚШ сиёсатини шакллантирмоқда, деди Bloomberg.

Агентликнинг қўшимча қилишича, Трампнинг ғалабаси ва унинг сиёсатда катта ўзгаришларга интилиши эҳтимоли ҳар икки мамлакатда ҳам, уларнинг чегараларидан ташқарида ҳам акс-садо бермоқда.

Трамп собиқ маъмуриятидаги суҳбатдошлардан бири сайланган президент АҚШнинг амалдаги етакчиси Жо Байденга қараганда қатъийроқ ҳисоблангани учун дарҳол ўз ишини бошлайди, деган фикрни билдирди.

Логан акти

Шу билан бирга, Қўшма Штатларда 1798 йилда қабул қилинган Логан акти амал қилади, унга кўра тегишли ваколатларга расман эга бўлмаган ушбу мамлакат фуқароларига Америка Қўшма Штатлари билан келишмовчиликлари бўлган хорижий давлатларнинг расмий вакиллари музокаралар олиб бориш тақиқланади.

2017 йилда Майк Флинн ушбу қонун қурбонига айланди. У Трампнинг миллий хавфсизлик бўйича маслаҳатчиси лавозимига тайинланганидан бир ой ўтмай – Россиянинг АҚШдаги элчиси бўлиб ишлаган Сергей Кисляк билан Россия Федерациясига қарши санкцияларни бекор қилиш бўйича муҳокамалардан сўнг истеъфога чиқишига тўғри келди. Суҳбатдан сўнг Флинн Федерал тергов бюроси ходимлари билан мулоқотда Кисляк ва ўзининг суҳбати мазмуни борасида ҳам «тўлиқ очиқ гапирмаган».

Трамп январда АҚШ президентлигига қайтади

Аввалроқ, Америка етакчиси Жо Байден 13 ноябр куни Оқ уйда Трамп билан ишларни ўтказиш масаласини муҳокама қилиши маълум бўлган эди.

Овозларни санаб чиқишнинг дастлабки натижаларига кўра, 5 ноябр куни бўлиб ўтган АҚШ президентлиги сайловида республикачилар партиясидан номзод Трамп ғалаба қозонган. Республикачи сайловчилар коллегиясининг 295 овозини қўлга киритди, демократ вице-президент Камала Ҳаррис эса 226 овозга таянди. Ғалаба қозониш учун ўз штатларида сайловчиларни ифодаловчи 270 та сайловчилар коллегияси овозини олиш керак эди.

Камала Ҳаррис энг юқори давлат лавозими учун курашда учраган мағлубиятини омма олдида тан олди. АҚШнинг янги президентининг инаугурацияси 20 январ куни бўлиб ўтади.

Байден ҳокимият ўз ворисига тинч йўл билан ўтишини таъминлашга ваъда берди. «Президент сифатидаги вазифамни бажараман. Қасамёдимни бажараман ва Конституцияни ҳимоя қиламан. 20 январ куни бу ерда Америкада ҳокимият тинч йўл билан ўтказилади», деди Байден 7 ноябр куни қилган мурожаатида.