Жанубий Корея жиддий сиёсий-ижтимоий зўриқишни бошдан кечирмоқда. 3 декабр куни кечқурун президент Юн Сок Ёл ҳарбий ҳолат эълон қилди, орадан бир неча соат ўтиб буни бекор қилишга мажбур бўлди. Унинг маъмурияти вакиллари бирин-кетин истеъфо бермоқда. Kun.uz билан суҳбатлашган сиёсатшунос фикрича, президент истеъфога чиқади ёки унга импичмент эълон қилинади.
Корея президенти 3 декабр куни эълон қилган ҳарбий ҳолатни 4 декабр тонгида бекор қилишга мажбур бўлди. Давлат раҳбари таъбири билан айтилган конституциявий тузумни сақлаб қолиш ҳамда коммунистик мафкурага қарши кураш, шимолдан келаётган хавфларга қарши туриш учун эълон қилинган ҳарбий ҳолат бир неча соат давом этди холос. Парламент депутатлари 3 декабр тунининг ўзидаёқ ҳарбий ҳолатни тугатишга овоз бериши президентни ҳам орқага қадам ташлашга мажбур қилди.
Айни дамда ҳарбий техникалар ва аскарлар базага қайтган. Мухолифат эса президентдан истеъфо талаб қиляпти, импичмент лойиҳаси ҳам парламентга тақдим этилди. Юн Сок Ёл маъмурияти аъзолари бирин-кетин истеъфо бермоқда.
Корея пойтахти Сеул шаҳрида яшовчи журналист Елена Чуянованинг айтишича, президентнинг ҳарбий ҳолат эълон қилганини жамоатчилик ўта кескин қабул қилди ва давлат раҳбари жиддий танқидлар остида қолиб кетди.
“Президент кеча ҳарбий ҳолат эълон қилиб, ўз тарафдорларини йўқотди. Корейс медиаси давлатда вазият бундан ҳам чигаллашмаслиги учун тарафкашликни четга сурди ва мавжуд вазиятни кўрсатиб турди. Депутатлар тун бўлишига қарамай, парламентга етиб келишди ва ичкарига кира олганлари ҳарбий ҳолатни бекор қилиш учун овоз берди. Президент энди катта эҳтимол билан истеъфога чиқади, лекин истеъфога чиқса ҳам ҳарбий ҳолат қарори учун алоҳида жазоланса керак. Бундан ташқари, унинг рафиқасига нисбатан суд иши ҳам барибир давом этади. Кореяда кечаги воқеа жиддий муҳокама мавзусига айланди, сиёсий доиралар президент хато қилганини айтяпти” – Елена Чуянова, журналист
Фуқаролик жамияти институтлари ҳукумат истеъфосини ҳам талаб этмоқда. Давлатдаги энг йирик мухолиф куч «Тобуро» партияси давлат раҳбарига, мудофаа ва ички ишлар вазирларига, шунингдек, ҳарбий қўмондон ва полиция бошлиғига қарши фитна айбловларини қўшишини ҳам қўшимча қилган. Кореяни яқиндан ўрганган сиёсатшунос Жасурбек Неъматуллоҳ фикрича, президент Юн бу қарорни фавқулодда қабул қилган, лекин энг маъқул пайт ҳам шу кунлар эди. Чунки унинг АҚШ президенти билан алоқалари жуда яхши ва Байден ҳали амалдаги президент эканида таваккал қилишга уринди. Юннинг таваккали акс натижа кўрсатди, энди унга импичмент эълон қилиниши тобора аниқ бўлиб бормоқда, дейди сиёсатшунос.
