Кипр Путиннинг собиқ курсдошига берилган «олтин паспорт»ни олиб қўймади

Россиянинг Украинага қарши уруши туфайли бир неча россиялик миллиардерларнинг Кипр фуқаролигидан маҳрум этилиши фонида, Россия президенти Владимир Путин атрофидаги бир қатор шахслар «олтин паспортлар» (Кипрнинг инвестиция фуқаролиги)ни сақлаб қолишади. Улар орасида Путиннинг Ленинград давлат университетидаги собиқ курсдоши Николай Егоров ҳамда Россия темирйўллари (РЖД) топ-менежерлари Сергей Тони ва Владимир Якунинларнинг қариндошлари бор, деб хабар берди 6 декабр, жума куни «Новая газета».

Кипрнинг «олтин паспортлари»га даъвогарлар рўйхатига кўра, Егоров ва унинг рафиқаси 2014 йил октябр ойида Кипр фуқаролигини олишган. Николай Егоров Путиннинг яқин доирасига киради. Версиялардан бирига кўра, айнан у Путиннинг сиёсий фаолиятини бошлаган ва уни Санкт-Петербургнинг ўша пайтдаги мэри Анатолий Собчак билан таништирган.

Егоров Россиядаги энг йирик юридик фирма - «Егоров, Пугинский, Афанасьев и Маркс Эгоров» (ЕПАМ) ҳаммуассисларидан бири бўлиб, унинг адвокатлари халқаро судларда Россия Федерацияси манфаатларини бир неча бор ҳимоя қилган. Егоров Путинга яқин одамлар билан биргаликда Геленжикдаги Путин қароргоҳини қуриш учун миллиардлаб доллар кредит берган «Инвестиционные решения» компаниясига эгалик қилади.

Бошқа «олтин паспорт» эгалари

Кипрнинг «олтин паспортлари»ни сақлаб қолганлар орасида Россия темирйўллари собиқ раҳбари Владимир Якуниннинг ўғли Виктор ҳам бор. Унинг отаси ҳам Путиннинг яқин дўстларидан бири. Кичик Якунин ҳужжатни 2016 йил бошида рафиқаси Даринанинг сармоялари асосида олган.

Россияда у «Поляндрия» болалар нашриёти, кичик гулчилик бизнеси ва «Леттерс» китоб дўконига эга. Дарина Якунинанинг барча компаниялари 10 миллиондан ортиқ соф фойда келтирмайди. У қандай қилиб 160 миллиондан кўпроқ пул тўплагани номаълумлигича қолмоқда (фуқароликнинг 2016 йилдаги курс бўйича тахминий қиймати).

«Новой-Европа» нашрига кўра, 2019 йилда «Россия темирйўллари»нинг яна бир топ-менежери Олег Тонининг ўғли Сергей Тони Кипр сармоявий фуқаролигини олган. Кичик Тони Россияда бизнесга эга эмас, лекин у офшор компаниялар орқали Европадаги кўчмас мулкка 50 миллиард еврога яқин сармоя киритгани айтилади.