Қашқадарёда хотинини ов қуроли билан отиб қўйган эркакка ҳукм ўқилди

Судя унга бир йил озодликдан маҳрум қилиш жазосини тайинлаган.

Фото: Видеодан кадр

Қашқадарё вилояти Қарши туманида маст қилувчи ичимлик таъсирида хотинини отиб қўйган эркакка ҳукм ўқилган. Бу ҳақда ИИВ ахборот хизмати хабар бермоқда.

Ҳодиса 2024 йил 23 май куни соат 17:30 ларда содир бўлган. Эркак кўчасидаги савдо дўконидан маст қилувчи ичимлик истеъмол қилиб уйига борган.

У уйида ишлаётган усталарга ёрдам бермоқчи бўлганида хотини уларга халақит берманг деб жанжал кўтарган.

“Овоза” информацион дастурида берилган лавҳада айтилишича, тортишув давом этаётган пайтда эркак уйидаги сейфда турган ов милтиғини олиб чиқиб, ўқлаган. Сўнг хотинини қўрқитиб қўйиш учун қуролни унга қарата ўнглаган

Шу пайтда аёл кўчага қочиб чиққан. Эркак эса тахминан 20-30 метрлар чамаси масофадан ерга қаратиб ўқ узган. Милтиқдаги сочма ўқларнинг бир қанчаси аёлга тегиб, уни жароҳатлаган.

Аёл зудлик билан шифохонага олиб кетилган. Эркакни эса ИИБ ходимлари қўлга олган.

Суд мажлисида эркак айбига қисман иқрорлигини, аслида хотинини жароҳатлаш нияти бўлмаганини, уни қўрқитиб қўйиш мақсадида қуролдан ерга қарата ўқ узганини айтган.

Жиноят ишлари бўйича Қарши тумани судида ўтказилган суд мажлисида эркак Жиноят кодексининг 126 прим бир моддаси 3-қисми билан айбдор деб топилган.

Судя унга бир йил озодликдан маҳрум қилиш жазосини тайинлаган.

#Қарши тумани