АҚШ Сурияда ИШИДнинг 75 тадан ортиқ объектига зарба берди

Башар Асад режими қулагач, АҚШ кучлари 8 декабр, якшанба куни Суриянинг марказий қисмидаги ИШИДнинг 75 дан ортиқ объектларига зарбалар берди. Ҳужумдан мақсад ИШИДнинг мамлакатдаги мавжуд беқарор вазиятдан фойдаланишга уринишларининг олдини олиш эди, дея тушунтирди АҚШ Марказий қўмондонлиги (CENTCOM).

Операцияда B-52 стратегик бомбардимончи самолётлари, F-15 қирувчи самолётлари ва А-10 ҳужумкор самолётлари иштирок этди. «Суриядаги барча гуруҳлар, агар улар ИШИД билан ҳамкорлик қилса ёки бирон-бир тарзда қўллаб-қувватласа, биз уларни жавобгарликка тортишимизни тушуниши керак», деди CENTCOM қўмондони Майкл Курилла матбуот баёнотида.

Аввалроқ АҚШ президенти Жо Байден Сурияда Асад режимининг қулашини «асосий адолат акти» ва шу билан бирга, «хатар лаҳзаси» деб атаган эди. «ИШИД ҳозирги вазиятдан фойдаланишга ҳаракат қилади ва бўшлиқни тўлдиришга уринади, биз бунга йўл қўймаймиз», деди у Оқ уйдаги нутқи чоғида. У, шунингдек, Асадни ҳокимиятдан маҳрум қилган баъзи гуруҳлар ўтмишда терроризм ва инсон ҳуқуқлари бузилишига алоқадор бўлганини қўшимча қилди.

Сурияда исёнчилар ҳокимиятни эгаллади

Қуролли гуруҳлар ноябр ойи охирида Сурия президенти Башар Асад ҳукумат кучларига қарши кенг кўламли ҳужум бошлади. Бир неча кун ичида улар бир қанча йирик шаҳарларни назорат остига олишга муваффақ бўлишди. 8 декабр куни Сурия исёнчилари давлат телевидениеси орқали пойтахт Дамашққа кириб, Башар Асад режимини ағдарганликларини эълон қилди. Дамашққа юриш билан бир вақтда исёнчилар иттифоқи мамлакатнинг шимоли ва шимоли-шарқига йўл олди.

Россия ТИВ маълумотларига кўра, Асад «президентлик лавозимини тарк этишга қарор қилган» ва Сурияни тарк этган. ТАСС агентлиги ўз манбаларига таяниб, у оиласи билан Москвада эканини маълум қилди.