«Сити» яна ютқазди, «Барса»да муҳим ғалаба. ЕЧЛда кун ўйинлари

Сеҳрини йўқотган Дортмунд

«Боруссия» Д — «Барселона» 2:3
Голлар: Гирасси (60 пеналти, 78) — Рафиня (53), Торрес (75, 85). 
«Боруссия» Д – Кобел, Бенсебайни, Шлоттербек, Жан, Рюэрсон (Коуто, 46), Рейна (Гросс, 73), Нмеча, Забитцер, Гиттенс, Гирасси, Дуранвил (Мален, 73).
«Барселона» – Пеня, Балде, Мартинес, Кубарси, Кунде, Педри (Гарсия, 90+3), Касадо, Рафиня (де Йонг, 71), Олмо (Лопес, 71), Ямал (Пау Виктор, 90+1), Левандовски (Торрес, 71).
Огоҳлантиришлар: Забитцер (42), Нмеча (51), Коуто (57), Кубарси (58), Бенсебайни (61), Торрес (90+2). 

«Ювентус» — «Манчестер Сити» 2:0
Голлар: Влаҳович (53), Маккенни (75). 
«Ювентус» – Ди Грегорио, Данило, Калулу, Гатти, Савона, Тюрам (Маккенни, 69), Локателли, Йилдиз (Мбангула, 84), Копмейнерс, Консейсау (Веа, 69), Влаҳович (Дуглас Луис, 85).
«Манчестер Сити» – Эдерсон, Люис, Гвардиол, Диаш, Уокер, Грилиш (Нунеш, 87), Гундўған, Доку (Савио, 79), де Брюйне, Силва, Ҳоланд.
Огоҳлантиришлар: Грилиш (84), Ди Грегорио (85), Силва (86).

Дортмунддаги ва Туриндаги ўйинларни умумлаштирадиган жиҳатлар етарлича эди. Биринчидан, бу ўйинлар турнинг энг ёрқин афишалари эди. Иккинчидан, икки учрашувда ҳам биринчи бўлим якунларига кўра таблодаги ноллар сақланиб қолди. Ниҳоят, икки учрашувда ҳам ўта қулай имкониятлардан фойдаланилмади. Туриндаги биринчи бўлим охирларида меҳмонлар ўта қулай вазиятга эга бўлишди, Де Брюйненинг пасидан кейин Ҳоланд яккама-якка вазиятга чиқиб борди ва тўпни дарвозабон устидан ташлаб қўйишга уринди, аммо Ди Грегорио қўлини кўтариб, оқшомнинг энг яхши сейвини ижро этишга улгурди.

Дортмундда эса «Боруссия» ва «Барселона» навбати билан хавфли вазиятларни кўкка совуришди. Аввалига Рафинянинг оёғига тўп яхши тушмагани туфайли вазият йўққа чиқди, унга бу сафар ҳам Ямал қанотдан шведка усулида пас берганди. Дортмундликлар сафида эса Забитцер бир неча метр масофадан гол уролмади. Иккинчи бўлим бошланганида Гирасси барибир тўпни дарвозага киритганида эса «асаларилар»нинг ҳужумдаги уч футболчиси ҳам Ҳанси Фликнинг офсайд қопқонига тушиб қолишганди.

53-дақиқада эса шунга ўхшаш вазиятда «Барселона» ҳисобни очди. Меҳмонлар прессингни енгиб ўтишди, Олмо ўзини қўриқлаётган рақибдан қочиб кетиб, Рафиняни яккама-якка вазиятга чиқариб юборди. Бенсебайни орқароқда қолиб кетгани туфайли офсайд рўй бермади. Бразилиялик вингер ерлатиб йўллаган зарбаси билан узоқ бурчакни аниқ нишонга олди – дарвозабон Кобел жойидан қимирлай олмади.

Худди шу дақиқада Туринда Эдерсон мезбонлар ҳимоячиси Гаттининг «қайчи» услубидаги зарбасини қайтарди, аммо меҳмон ҳимоячилар сусткашлиги туфайли ҳужум иккинчи темпда давом эттирилди ва Влаҳович бош билан йўллаган зарбадан кейин дарвозабон тўпни қўлидан чиқариб юборди ва тўп дарвоза чизиғини кесиб ўтди.

Икки ўйиндаги воқеалар шундан кейингина фарқли тус олди. «Барселона» Кубарсининг анча қўпол фоли туфайли муваффақиятини ривожлантира олмади. У тушунарсиз ҳолда жарима майдони ичида Гирассини туртиб йиқитиб, унга пеналти ва жавоб голини совға қилди. Бу вақтда Ди Грегорио «Юве»ни қутқаришда давом этарди, у Гундўғаннинг «тўққизлик»ка бораётган кучли зарбасини бартараф этди. Бунга жавобан амалга оширилган ҳужумда туринликлар иккинчи голни уришди, бу эпизодда америкаликлар боғлами ажойиб ҳаракат қилди. Веа тезкор ҳужумда тўпни юмшоқ ошириб берди, Маккенни ҳаводаги тўпга акробатик услубда зарба йўллади - 2:0.

Ди Грегорио «Кекса синиора»га ғалаба учун имкон қолдирди ва жамоа бундан фойдаланди. Дортмундда эса дарвозабонлар идеал эмасди. Кобел ўзига келган зарбани «Барса»ни ҳисобда олдинга олиб чиққан Ферран Торресга ташлаб берди.

Пеня эса ҳимоячилар сунъий офсайд юзага келтиришда йўл қўйган хатосини тузатишга уриниб, жарима майдони ташқарисига чиқиб келди, аммо тўпга улгурмади, натижада Гирасси бўш дарвозани ишғол этиб, иккинчи бор ҳисобни тенглаштирди.

Бу голга ҳаммуаллифлик қилган Гросс эса бир неча дақиқа ўтиб орқага пас беришда хато қилди ва меҳмонлар тезкор қарши ҳужум уюштиришди. Ҳужум якунида Ямал ажойиб пас билан Торрес ғалаба голини уриб, дубл расмийлаштиришига ёрдам берди.

«Барса» қаторасига беш учрашувда ғалаба қозониб, плей-офф масаласини ҳал қилди. Бу мавсумда илк бор ютқазган «Боруссия»да ҳам вазият ёмон эмас (12 очко). Бундан битта камроқ очко жамғарган «Ювентус»да ҳам. «Сити»нинг ҳолати эса хавотирли. Саккиз очко жамғарган «шаҳарликлар» (бу Хосеп Гвардиола фаолиятида турнир гуруҳ босқичидаги олти турда қайд этган энг ёмон кўрсаткич) январда «ПСЖ» билан ўйнашига тўғри келади. Каталониялик мутахассис мураббийлик фаолиятида сўнгги ўн учрашувдаги энг ёмон сериясини қайд этмоқда (+1=2-7).

Монегаскликлар 10 дақиқа ичида таслим қилинди

«Арсенал» — «Монако» 3:0
Голлар: Сака (34, 78), Ҳаверц (88). 
«Арсенал» – Райя, Кивёр, Салиба, Люис-Скелли (Тимбер, 64), Парти, Мерино, Райс (Жоржинио, 64), Эдегор (Нванери, 79), Мартинелли (Троссар, 64), Жезус (Ҳавертц, 73), Сака.
«Монако» – Маецки, Кайо Энрике, Салису, Керер, Вандерсон (Тезе, 81), Магасса (Минамино, 46), Камара (Матазо, 81), Бен-Сегир, Головин, Аклиуш, Эмболо (Иленикена, 81).
Огоҳлантиришлар: Мартинелли (32), Мерино (60), Вандерсон (63).

«Арсенал» ва «Монако» Чемпионлар лигасининг олтинчи турига 10 тадан очко жамғариб, турнир жадвалида ёнма-ён ҳолатда етиб келганди. Аммо майдонда жамоалар бошқа-бошқа даражада экани яққол кўриниб қолди.

«Канонирлар» тезда ташаббусни қўлга олди ва вазият кетидан вазият яратишга киришди. 25-дақиқада Габриэл Жезус Якуб Кивёрнинг ортдан узатмасидан кейин яккама-якка вазиятга чиқиб борди. Аммо бу мавсумда ўйин амалиётига эга бўлмаётган бразилиялик рақиб дарвозабони Маецки билан дуэлни бой берди. Уч дақиқа ўтиб Габи яна бир қулай имкониятни кўкка совурди — яна жарима майдонига ёриб кириб зарба берди ва бу сафар ҳам дарвозабонни алдай олмади.

Монегаскликлар умуман тўпни рақиб томонда ушлай олмади ва қарши ҳужумлар ҳам уюштирмади. 34-дақиқада эса «Арсенал» барибир ҳисобни очди — Букайо Сака Жезуснинг қанотдан узатмасини яқин масофадан дарвозага киритиб, карьерасидаги энг оддий голлардан бирини урди. Бу ҳужумда 18 ёшли яримҳимоячи Майлз Люис-Скелли асосий ишни бажарди: Мартин Эдегорнинг ноқулай узатмасидан кейин тўпни ўзига бўйсундириб, Магнес Аклиушни алдаб ўтди ва тўпни Жезусга етказиб берди.

Кейин эса меҳмонлар майдон марказида қўпол хатога йўл қўйиб, Эдегор яккама-якка вазиятга эга бўлишига қўйиб беришди, аммо норвегияликнинг зарбасидан кейин тўп устун ёнидан ўтиб кетди. Яна бир қулай вазиятдан Мартинелли фойдалана олмади. Умуман, «Арсенал» биринчи бўлимдаёқ йирик ҳисоб қайд этиши мумкин эди, аммо бу иш иккинчи бўлимга қолди.

Иккинчи бўлимда меҳмонлар ташаббусни қўлга олди ва қатор вазиятларга эга бўлди, айниқса Салибанинг пасидан кейин тўпни эгаллаб олган Минамино тўпни Эмболога етказиб берганида ҳисоб тенглашиши ҳам мумкин эди. Микел Артета дарҳол ўйинчи алмаштиришлар орқали вазиятни ўнглади — Леандро Троссар ва Кай Ҳаверц «канонирлар» ўйинини кучайтиришди. 

78-дақиқада Ҳаверц Салисунинг дарвозабонга узатган пасини эгаллаб олди ва Сака яна бир оддий гол уришига ёрдам берди. Ҳисоб 0:2 кўринишига келгач, «Монако» ўйинни ташлаб юборди ва бир неча дақиқа ўтиб Букайо Кайга ассистентлик қилди.

«Арсенал» бу ғалаба эвазига учинчи ўринга кўтарилди — январда Артета шогирдлари «Динамо» Загреб ва «Жирона» каби аутсайдерларга қарши ўйнайди. Лондонликлар амалда катта саккизликдаги ўрнини сақлаб қолади. «Монако» эса 16-ўринга тушиб кетди, аммо ҳисобидаги 10 очко топ-24 да қолиши учун етарли бўлиши мумкин. Монегаскликларни олдинда «Астон Вилла» ва «Интер» билан ўйинлар кутмоқда.

«Атлетико»да қаторасига ўнинчи ғалаба

«Атлетико» — «Слован» 3:1
Голлар: Алварес (16), Гризманн (42, 57) — Стрелец (51, пеналти). 
«Атлетико» – Облак, Галан, Лангле, Хименес, Лоренте, Лино (Галлаҳер, 73), Барриос (Коке, 46), Де Паул, Симеоне, Алварес (Рикелме, 73), Гризманн (Сёрлот, 73).
«Слован» Братислава – Такач, Вут, Кашия, Байрич (Вайсс, 84), Медведев (Метсоко, 72), Саввидис (Мустафич, 84), Куцка, Блэкмэн, Мак (Шарани, 72), Барсегян (Марцелли, 35), Стрелец.

Ўйин куни натижасини олдиндан айтиш мумкин бўлган ўйин билан бошланди, иложсиз ҳолатдаги аутсайдер «Атлетико»га меҳмонга келгани. Мадридликлар нафақат плей-офф йўлланмасини ҳал қилди, балки ўз тарихида иккинчи бор қаторасига ўн учрашувни ғалаба билан якунлади. «Слован» 25 дақиқа чидаб берди — Алварес жарима майдонига кирибоқ олис «тўққизлик»ни аниқ нишонга олгунича. Меҳмонлар учун яна бир ёқимсиз ҳолат Барсегян жароҳат олиши бўлди. Арманистонлик яримҳимоячи ҳар бир ўйинда фаоллиги билан ажралиб турганди ва Мадриддаги ўйинда ҳам хавфли зарба йўллаб, тўсинни пойлашга улгурганди. Биринчи бўлим охирида эса Гризманн дарвозабондан баландроқ сакраб, ҳисобдаги фарқни оширди ва ўйин масаласини амалда ҳал қилди.

Аммо иккинчи бўлим бошида кутилмаганда Владимир Вайсс жамоаси интригани қайтарди. «Слован» VAR туфайли пеналти тепиш ҳуқуқини қўлга киритди. Лекин қаторасига беш ўйинда гол уриб келаётган Гризманн тезда статус-квони тиклади. Антуан ЕЧЛда 50 гол урган тўртинчи французга айланиши учун яна учта аниқ зарба қолди. Бир кун олдин Мбаппе бу натижага эришиб, Анри билан тенглашиб олганди, биринчи ўриндаги Бензема эса космик фарқ билан олдинга чиқиб кетган (90).

Мадриддаги ўйин уникал воқеа билан ЕЧЛ тарихида қолди. Турнир тарихида илк бор икки рақиб захира ўриндиғида ҳам ота мураббийлар — катта Вайсс ва Диего Симеоне ўтиришди, майдонда эса уларнинг ўғиллари — кичик Владимир Вайсс ва Жулиано Симеоне ҳаракат қилди. Эътиборли томони, словакиялик яримҳимоячи «Манчестер Сити»дан учралган мағлубиятдан (0:4) кейин фаолиятини тугатганини айтганди. У 1 октябрдан буён бирор марта ҳам «Слован»нинг ўйинлари заявкасига киритилмади, бу сафар эса охирги дақиқаларда майдонга туширилди.

Асаббузарлик ва жароҳатлар

«Милан» — «Црвена Звезда» 2:1
Голлар: Леау (42), Абраҳам (88) — Радонич (67). 
«Милан» – Менян, Тео, Тиав, Габбия, Калабрия (Эмерсон, 83), Рейндерс, Фофана, Леау, Лофтус-Чик (Чуквуэзе, 28), Муса (Камарда, 83), Мората (Абраҳам, 29).
«Црвена Звезда» – Гутеша, Сол Ён У, Спайич, Жига, Мимович (Канга, 75), Элшник, Крунич, Милсон (Иванич, 46), Максимович (Радонич, 60), Мвумпа, Ндиайе (Дуарте, 86). 
Огоҳлантиришлар: Муса (32), Крунич (33), Тео (45), Томори (79), Жига (81).

Турнирда қаторасига уч ғалабага эришган «Милан» бу сафар кадрлар бўйича муаммога дуч келди. Россонерилар январгача Пулишич хизматларидан фойдалана олмайди, «Црвена Звезда»га қарши ўйиннинг биринчи бўлимида эса Лофтус-Чик ва Мората жароҳат олиб майдонни тарк этди. Жамоа бўлимни мағлуб ҳолда якунлаши ҳам мумкин эди, аммо Максимовичнинг зарбасидан кейин тўп тўсинга борди. Кейин эса савия ўз сўзини айтди. Фофана узоқдан Рафаэл Леауга ажойиб пас узатди. Португалиялик ҳужумчи ҳаводаги тўпни бир ҳаракатда ўзига бўйсундирди, иккинчи ҳаракатда эса уни тўсин остидан дарвоза тўрига жойлади. Иккинчи бўлимда эса «Милан» ҳам Радоничдан шу каби чиройли гол ўтказиб юборди ва мухлисларини асабийлашишга мажбур қилди. Фақат сўнгги дақиқаларда Абраҳам тўсиндан қайтган тўпни барибир дарвозага киритиб, ғалабани таъминлади.

«Фейеноорд» «ПСЖ»ни яна пастга тушириб юборди

«Бенфика» — «Болоня» 0:0
«Бенфика» – Трубин, Фернандес, Отаменди, Араужу, Ба, Кўкчу (Артур, 80), Флорентину, Эурснес, Актуркўғли (Бесте, 72), Ди Мария, Павлидис (Амдуни, 72).
«Болоня» – Скорупски, Ҳолм, Казале (Лукуми, 73), Бекема, Пош (Корацца, 88), Моро (Фройлер, 73), Фергюсон, Илинг-Жуниор, Фаббиан (Побега, 73), Урбански (Ндойе, 72), Даллинга.
Огоҳлантиришлар: Павлидис (24), Флорентину (48), Фаббиан (53), Ба (59), Казале (62), Кўкчу (63), Фергюсон (71), Отаменди (76), Фройлер (89), Ҳолм (90+5).

«Бенфика» «Болоня» мудофаасини ёриб ўтолмади, Павлидиснинг тезкор голи эса офсайд туфайли бекор қилинди. Биринчи бўлим охирида Ди Марияга чиройли гол уришга имкон бермаган Скорупски лиссабонликларга ўйин давомида муаммо туғдирди. Полшалик посбоннинг яна бир чиройли номери ўзининг хатосини тузатиши орқали намойиш этилди. Скорупски тўпни Павлидиснинг оёғига ташлаб берганди, аммо дарҳол масофани яқинлаштириб, зарбани тўсишга эришди. Кейинроқ Ди Мариянинг яна бир ҳужумини тўхтатди.

«Фейеноорд» — «Спарта» 4:2
Голлар: Траунер (8), Пайшао (10), Ҳаж-Муса (30), Хименес (63) — Раҳмани (43), Белен (80, автогол). 
«Фейеноорд»– Велленройтер, Смал (Белен, 59), Ҳанцко, Траунер, Ниукоп (Буэно, 75), Тимбер, Ҳван Ин Бом (Зерруки, 75), Миламбо, Пайшао, Хименес (Осман, 69), Ҳаж-Муса (Стенгс, 75).
«Спарта» – Виндал-Йенсен, Коббаут (Панак, 68), Соренсен, Витик, Ринеш (Зелени, 83), Солбаккен (Лячи, 68), Кайринен, Садилек, Визнер, Бирманчевич (Красники, 77), Раҳмани (Олатунжи, 77).
Огоҳлантиришлар: Виндал-Йенсен (10), Соренсен (37), Хименес (51), Витик (53), Зелени (90).

«Фейеноорд» плей-оффга чиқиш учун муҳим ғалабага эришиб, очколари сонини 10 тага етказди. Роттердамликлар учун барчаси январ ойида «Бавария» ва «Лилл»га қарши кечадиган ўйинларда ҳал бўлади, «Спарта» ўйин дебютидаёқ таслим этилди. Барчаси Траунернинг бурчак зарбасидан кейинги голи билан бошланди, нидерландлар биринчи бўлимда учта гол уришди, асосий еврокубокда бунақаси жамоа тарихида 1974 йилдан буён кузатилмаганди. Бундай стартдан кейин устунликни сақлаб қолиш ортиқча қийинчилик туғдирмади. «Фейеноорд» бу ғалабадан кейин плей-офф зонасига кўтарилиб, 24-ўринда турган «ПСЖ»ни 25-ўринга тушириб юборди, парижликлар январда «Манчестер Сити» ва «Штутгарт»га қарши ҳаёт-мамот ўйинларида майдонга тушади.

«Штутгарт» — «Янг Бойз» 5:1
Голлар: Штиллер (25), Мийо (53), Фюрих (61), Вагноман (66), Кейтел (76) — Лакоми (6).
«Штутгарт» – Нюбел, Миттелштедт (Ад Даҳил, 76), Шабо, Руо (Стергиу, 83), Вагноман (Штенцел, 76), Штиллер, Каразор (Кайтел, 46), Фюрих (Маланга, 77), Мийо, Ридер, Демирович.
«Янг Бойз» – фон Баллмос, Ҳажам (Блум, 70), Бенито, Камара (Пфайффер, 70), Атекаме, Лакоми, Угринич, Алмада Монтейру, Имери (Малес, 62), Виржиниюс (Колли, 76), Иттен (Ганвула, 62).
Огоҳлантиришлар: Бенито (58), Ҳажам (60), Угринич (89), Лакоми (90).

Умумий жадвалда «ПСЖ» ортидан жойлашган «Штутгарт» ўтган мавсумдаги каби кучли ўйин кўрсата олмаяпти. Олдинги турда немислар «Црвена Звезда»га шармандали ҳисобда ютқазганди (5:1), энди эса Сабастиян Ҳёнесс жамоаси аутсайдердан дебютдаёқ гол ўтказиб юборди. Дарвозабон Нюбел яқин бурчакка йўлланган зарбага ташланишга ҳам улгурмади. Аммо бу сафар жамоа вазиятни ўнглай олди. Бўлим ўрталарида Штиллер мувозанатни тиклади, иккинчи бўлимда мезбонлар бир неча дақиқа ичидаги икки гол билан меҳмонларни синдиришди. Швейцарияликлар шундан кейин сочилиб кетди, «Штутгарт» ғалабасининг асосий архитектори эса уч марта шерикларига ассистентлик қилган Ридер бўлди. 1:5 ортидан 5:1 ҳисобида ғалаба қозонган немислар кейинги турда яна бир аутсайдер жамоа «Слован»га қарши ўйнайди ва бу учрашувда ғалаба қозониб, плей-оффга ўтиш ўйинларига илиниши мумкин.

«Лилл» — «Штурм» 3:2
Голлар: Саҳравий (37), Баккер (45+2), Ҳаралдссон (81) — Китеишвили (45+4), Бирет (47).
«Лилл» – Шевале, Исмаили (Гудмундссон, 68), Алессандро, Диаките, Менье, Буадди (Мукау, 56), Андре, Баккер (Ҳаралдссон, 80), Кабелла (Фернандес Пардо, 68), Саҳравий (Байо, 80), Дэвид.
«Штурм» – Худяков, Лавале, Вютрих, Гайрҳофер, Жонстон (Малич, 87), Горенц-Станкович (Ҳирлендер, 84), Китеишвили, Ялкуйе, Чуквуани (Жатта, 87), Бевинг (Хорват, 85), Бирет.
Огоҳлантиришлар: Чуквуани (8), Баккер (74).

Австрия чемпионлари ўтган турда ниҳоят биринчи ғалабага эришганди. Лиллда эса меҳмонлар биринчи бўлимдаёқ икки гол ўтказишди. Бўлим охирида ҳисоб қисқарди, иккинчи бўлим бошида тенглаштирилди. Аммо ўйин охирида Грацдан келган жамоа барибир мудофаада хатога йўл қўйди ва майдонга эндигина тушган Ҳаралдссон тўпни яқин бурчакка михлади. 15 ўйиндан буён ютқазмаётган Брюно Женезио шогирдлари бу ғалабадан кейин 13 очко билан энг яхши саккизликка кириб олди, «Штурм»нинг плей-оффга чиқиш имконияти эса нолга яқинлашди. Январда, Австрияда чемпионатда танаффус юзага келганида, қора-оқлар «Аталанта» ва «Лейпциг» билан ўйнайди.

Кун статистикаси

Француз клублари тарихда 1-марта Чемпионлар лигасида Англиядан бўлган рақибларга кетма-кет тўққизинчи ўйинни бой берди.

Кенан Йилдиз «Ювентус» сафида Погба ва Миреттилан кейин ЕЧЛда 20 ёшга қадар 6 ўйин ўтказишга улгурган 3-футболчи бўлди.

17 ёшу 2 ойлик — «Лилл» яримҳимоячиси Буадди француз клублари сафида асосий еврокубокда 5 ўйин ўтказган энг ёш футболчи.

Гризманн Диего Симеоне бошқарувидаги «Атлетико»да ЕЧЛда 36 гол урди. Аргентиналик мураббий ва француз тўпурар фақат икки жуфтликдан ортда: Хосеп Гвардиола ва Месси (43 гол) ҳамда Юрген Клопп ва Салоҳ (41).

«Манчестер Сити» яримҳимоячиси Бернарду Силва турнирда 74-ўйинини ўтказиб, клуб рекордини ўрнатди.

«Монако» ЕЧЛда 100-ўйинини ўтказди. Монегасклар бу борада француз клублари орасида фақат «ПСЖ» (157), «Лион» (136) ва «Марсел» (106)дан ортда.

Турнир жадвали