“Газ иссиқ ўлкаларга учиб кетди”: “заправка”ларда яна узундан узун навбатлар пайдо бўлди

Ўзбекистонга совуқ ҳаво кириб келгани ортидан ҳудудлардаги газ “заправка”лари фаолиятига чекловлар киритилди. Бунинг оқибатида газ тўлдириш шохобчаларида километрлаб навбатлар пайдо бўлди. Ҳайдовчилар автомобилига газ қуйиш учун 5-6 соатлаб кутишга мажбур бўлмоқда. Kun.uz мухбири ҳолат бўйича Фарғона аҳолиси фикрига қулоқ тутди.

Фарғона шаҳридаги метан “заправка”лар олдида ҳам бошқа ҳудудлардагидек турнақатор навбатлар юзага келган. Ҳайдовчилар фикрига кўра, ҳозирда “заправка” ҳудудига кириб олишнинг ўзи ҳақиқий бахт.

Аксарият ҳайдовчиларнинг машинаси метанда юришга мослашган. Бензин қиммат, сифатлисини топиш қийин. Kun.uz билан суҳбатда бўлган аҳоли вакилларидан бири метан “заправка”ларда айнан қайси вақтларда газ бўлиб, қачон бўлмаслиги ҳақида маълумот йўқлиги, бу эса одамларнинг вақтларини режалаштиришга йўл қўймаётганлигини айтиб, норозилик билдирди.

Расмийлар ҳолатни ҳавонинг кескин совиб кетиши натижасида газ қувурларида босим пасайиши сабабли табиий газ энг аввало аҳоли ва ижтимоий соҳа объектларига етказиб берилиши билан изоҳламоқда.

Сарвар Зиёев, Kun.uz

Монтаж устаси: Сардор Мамиров

#навбатлар #метан #заправка #Газ