DW хабарига кўра, Ли Чжэ Мён 2 октябрга ўтар кечаси Х ижтимоий тармоғида Украина билан юзага келган келишмовчилик ҳақида баёнот берган.
«Агар фактларни тан олиш ва омма олдида узр сўраш яна рад этилса, биз қўшимча чоралар кўрамиз. Бу Корея халқи ва давлатининг шаъни масаласи, биз уни эътиборсиз қолдира олмаймиз», — деб ёзган Жанубий Корея раҳбари.
У Киевни Сеулни «ёлғончи» қилиб кўрсатишда ҳам айблаган. Бироқ қандай чоралар кўрилиши мумкинлигига аниқлик киритмаган.
Киев: бу дипломатик тушунмовчилик
Украина ташқи ишлар вазири Андрей Сибиха президент Лининг баёнотидан бир неча соат аввал Киев Жанубий Корея билан низони тезроқ ҳал қилишдан манфаатдор эканини билдирган.
«Буни инцидент деб аташни истамасдим. Келинг, дипломатик тушунмовчилик дейлик», — деган у Киевда журналистлар билан мулоқотда.
Сибиханинг айтишича, сўнгги кунларда у Жанубий Корея ташқи ишлар вазири билан ҳар куни шахсан мулоқот қилмоқда.
«Бу вазият яқин вақт ичида ҳал этилишини жуда истайман ва биз шунинг устида ишлаяпмиз. Жанубий Корея биз учун муҳим мамлакат», — дея таъкидлаган Украина ташқи ишлар вазири.
У Сеул билан ҳамкорлик давом этиши ва амалий натижалар беришига умид билдирган.
Низога икки асир ҳақидаги баёнот сабаб бўлди
Сентябр охирида Украина президенти Володимир Зеленский БМТ Бош Ассамблеясида Киев икки шимолий кореялик ҳарбий асирни Жанубий Кореяга топширганини маълум қилган. Шундан сўнг Сеул Украина томонини кескин танқид қилган.
Ли Чжэ Мённинг таъкидлашича, бундай маълумотнинг ошкор этилиши асирларнинг Шимолий Кореяда қолган қариндошларини хавф остига қўйиши мумкин. Шунингдек, бу Сеул ва Пхенян муносабатларига салбий таъсир кўрсатиши эҳтимоли бор.
Жанубий Корея ташқи ишлар вазирининг биринчи ўринбосари Пак Юн Жу эса Киевнинг махфийлик келишувини инкор этиши ўзаро ишончга путур етказишини айтиб, расмий изоҳ ва узр талаб қилган.
Украина президентининг коммуникациялар бўйича маслаҳатчиси Дмитрий Литвин, ўз навбатида, Киев ва Сеул ўртасида асирлар тақдири ҳақидаги маълумотни ошкор қилмаслик бўйича келишув бўлмаганини билдирган.
