АҚШ президенти Доналд Трамп Оқ уйдаги биринчи кунида сайловолди ваъдаларини бажарувчи 100 га яқин фармонни имзолади. Таққослаш учун, Жо Байден лавозимга киришганидан кейин 17 та ҳужжатни имзолаш билан чекланганди.
Масалан, ноқонуний миграцияга қарши кураш доирасида Трамп АҚШнинг жанубий чегарасида фавқулодда ҳолат эълон қилди, бу ноқонуний муҳожирларни оммавий депортация қилишга ёрдам беради. У, шунингдек, ҳуқуқ-тартибот идоралари мигрантларни иммиграция бўйича суд мажлисларини кутаётган пайтда қўйиб юборадиган catch and release («қўлга олиш ва қўйиб юбориш») амалиётини тўхтатди. Трампнинг фармонлари қочқинларни жойлаштириш дастурларини тўхтатиб қўйди ва мигрант болаларнинг Қўшма Штатлардаги туғилиш ҳуқуқи асосида АҚШ фуқаролигини олишини бекор қилди.
Қўшма Штатларнинг энергетика секторини ривожлантириш учун республикачи нефт ва газ каби табиий ресурсларни қазиб олиш ва ишлаб чиқаришни «максималлаштириш» ва тегишли лойиҳаларни тасдиқлашни тезлаштиришни буюрди. У глобал исишни чекловчи Париж иқлим келишувидан чиқиш жараёнини бошлади ва Бирлашган Миллатлар Ташкилотининг Иқлим ўзгариши бўйича доиравий конвенцияси доирасида АҚШнинг барча молиявий мажбуриятларини тугатиш тўғрисидаги буйруқни имзолади.
Капитолийга ҳужум қилганлар афв этилди
Бундан ташқари, Доналд Трамп 2021 йил 6 январда Капитолийга бостириб киришда қатнашган 1000 дан ортиқ кишига нисбатан қамоқ жазоларини қисқартирди ва жиноий ишларни ёпишни буюрди, Вашингтоннинг расмий сиёсати сифатида фақат икки жинс — аёл ва эркакни тан олиш ҳақида кўрсатма берди, федерал даражада ўлим жазосининг тикланиши ва АҚШнинг Жаҳон соғлиқни сақлаш ташкилоти (ЖССТ) таркибидан чиқиши ҳақида ҳужжат имзолади.
Трамп ўз инаугурациясида бир қатор радикал ташаббусларни эълон қилди
АҚШнинг янги президенти Доналд Трамп ўзининг инаугурациясини мамлакат учун тарихий бурилиш нуқтаси деб атади. 2025 йилнинг 20 январи Қўшма Штатлар фуқаролари учун «озодлик куни» бўлади, деди у душанба куни Вашингтондаги Капитолийда қасамёд қилганидан сўнг ўзининг инаугурацион нутқида.
Президент сифатида қасамёд келтирганидан сўнг халққа мурожаат қилган Трамп тажовузкор оҳангда бўлди ва бир қатор кенг қамровли ташқи ва ички сиёсат ташаббусларини эълон қилди. У энергетика соҳасида фавқулодда ҳолат эълон қилишга ваъда берди, бу қазиб олинадиган ёқилғини кўпайтириш имконини беради. «Биз яна бой давлатга айланамиз, бунда оёғимиз остидаги суюқ олтин ёрдам беради», — деди у.
