“Бошимизни деворга урарди” – Зангиотада эгизак қизларини мунтазам калтаклаб келган ота 3 йилга қамалди

Тошкент вилоятининг Зангиота туманида фарзандларини доимий равишда калтаклаб келган ота жиноий жазога тортилди. Kun.uz суд ҳужжати билан танишди.

Суд ҳукмида келтирилишича, Қашқадарё вилоятининг Яккабоғ туманида рўйхатда турувчи, 1977 йилда туғилган Д.П. икки қизи ва бир ўғли билан Зангиота тумани Боғзор маҳалласида ижарада яшаб келган. Унинг турмуш ўртоғи М.Б. эса Россияда ишлаб, маълум бир вақтда уйига келиб турган.

Д.П. 2010 йилда туғилган эгизак қизларини муттасил равишда дўппослаб, уларга нисбатан жисмоний ҳамда руҳий жиҳатдан азоб берган ҳолда қийнаб келган. Бунинг оқибатида қизлар турли даражада тан жароҳати олишган.

Эркак судда айбига иқрор бўлиб, қизларини тарбиялаш учун шундай қилганини, қизлари айтганини қилмай қўйгани учун урганини билдирган.

“2009 йилда ишлаш мақсадида Россиянинг Москва шаҳрига бордим ва 2010 йилга қадар ишладим. 2013 йилда судланиб, 9 йил муддатга қамалдим. Ўша вақтда турмуш ўртоғим ишлаш мақсадида Россияга кетди. Шундан буён ҳар йили ҳар хил муддатларда Россияга бориб ишлаб келади.

2016 йилда озодликка чиқдим. 2017 йилда маълум муддат Россияда ишлаб келдим. Шундан буён киракашлик қиламан.

2024 йилдан бошлаб ишдан уйга чарчаб келган вақтимда қизларим айтганимни қилмасдан, менга гап қайтарадиган одат чиқаришди. Шунда жаҳлим чиқиб, уларни тарбиялаш мақсадида асосан катта қизимни бир неча маротаба қўлим ва “швабра” билан урганман”, деган Д.П. суддаги кўрсатмасида.

У қилган ишидан пушаймонлигини билдириб, ўзига нисбатан енгил жазо тайинлашни сўраган.

Судда қонуний вакили иштирокида сўроқ қилинган қиз эса аксинча кўрсатма берган. У отаси арзимас сабаблар билан мунтазам уриб келганини айтиб, суддан дадасига қонуний чора кўришни сўраган.

“2023 йил тахминан ёз ойларида отам тўсатдан арзимаган нарсаларни баҳона қилиб, бизни аёвсиз калтаклади: қўлини мушт қилган ҳолда бош ва юз қисмимизга дўппослади, шафқатсизларча бошимизни девор ва шкафларга урди.

Шундан сўнг бу ҳолат бир неча маротаба такрорланди. Онам ишлаб турган жойидан пул жўнатмаса ҳам овқатнинг тузини баҳона қилиб урарди. Агар буни онамга айтадиган бўлсак ўлдириб юбориш билан қўрқитарди. Дадам бизни урган ҳолатларни акам яширинча видеога оларди.

Онам жўнатган пулларни рўзғорга сарф қилмасди. Оч қолиб ухлаган вақтларимиз бўлган: бизни уйга қамаб, ташқарига чиқиб кетарди”, деган қиз.

Фарзандлар отанинг бу ишини Россияда ишлаб юрган онага айтган. Д.П.нинг турмуш ўртоғи дарҳол етиб келган ва ҳолат юзасидан ИИБга хабар берган.

Суд ҳукми билан Д.П. Жиноят кодексининг 110-моддаси (қийнаш) 2-қисми “а, в” бандларида назарда тутилган жиноятни содир этганликда айбли деб топилган. Унга 3 йил муддатга озодликдан маҳрум қилиш жазоси тайинланган.