Алмашиб қолган қора танли бола ёки икки кишининг умрига зомин бўлган ошиқ аёл

Аммо кўп ўтмай уни шаҳардаги бинолардан бирининг кўча томондаги зинаси остида йиқилиб, ҳушсиз ётган ҳолатда топиб олишади. Ёнида аравачада боласи бор эди.

Маринани дарҳол шифохонага олиб боришади. Унинг аҳволи оғир бўлгани учун дарҳол жонлантириш бўлимига олинади. Маринани боласи билан сайр қилиб юрганида эҳтиётсизлик туфайли зинадан пастга тушиб кетган деб тахмин қилишади.

Врачлар шифохонада аёлни муолажа қилаётганда милицияга Марина йиқилган жойда яшовчи бир аёл қўнғироқ қилади. У Марина эҳтиётсизлик оқибатида йиқилмаганини, уни мотоцикл миниб келган бир эркак чуқур зинага итариб юбориб, қочиб кетганини айтади.

Милиция дарҳол мотоцикл миниб келган шахсга қидирув эълон қилади. Биринчи гумондор Маринанинг эри Игор бўлади. Чунки унда ҳам мотоцикл бор эди. Бунинг устига, аёл қора танли бола туғганида Игор хотинига хиёнатни тан олишини айтиб, бир неча бор таҳдид қилганди.

Милиция Игорни ҳибсга олишга қарор қилади. Ўшанда уни ушлаш учун кетишаётганда мотоцикл минган эркак қора танли одамга ҳужум қилгани ҳақида хабар келиб тушади.

Милицияда Игор хотинини ўша қора танли шахс билан ишқий муносабатда бўлган деб ҳар иккаласига ҳужум қиляпти деган тахмин пайдо бўлади. Ҳодиса жойига етиб боришганда гумонлар тасдиқланади. Қора танли одамга ҳужум қилган шахс Игор эди. Милиция дарҳол уни ҳибсга олади.

Милиция бўлимида ўтказилган сўроқда Игор хотинига суиқасд қилмаганини ва уни чуқурга итариб юбормаганини айтади. Қора танли кишига уюштирилган ҳужумни эса хотини қора танли чақалоқ туғганидан сўнг кучли стрессда юргани билан изоҳлайди. Игорни ҳибсда қолдиришади.

Эртаси куни Игорнинг ишдаги раҳбари бўлган аёл Наталя Рудинская милиция бўлимига келади. Бу аёл Калуга обкомида ишлар, Игор унга ҳайдовчилик қиларди. У Марина зинадан пастга итариб юборилганда йигит ишхонада бўлгани ҳақида гувоҳлик беради.

Бироқ милиция Игорни озод қилишга шошилмайди ва суриштирувни давом эттиради. Милиция ҳужумга учраган қора танли шахс Франция фуқароси эканини, у Калугада шартнома асосида ишлаб келаётганини аниқлайди.

Қора танли шахс Марина билан содир бўлган иш ҳақида ишхонасида эшитган бўлиб чиқади. Франциялик эркак аёлни эри ташлаб кетганини билиб, ўша куни унга ёрдам бериш мақсадида Маринанинг уйи томонга боради.

Бироқ аёл унинг ёрдамини рад этади. Эркак ортга қайтаётганида Игор кўриб қолади ва ундан ўч олишга қарор қилади. Бир неча кундан сўнг Игор қора танли эркакка ҳужум қилади. Шундан сўнг милиция уни ишга алоқаси йўқ деб топади.

Игорнинг айбсизлиги, врач ва акушернинг ўлдирилиши

Бу орада Марина шифохонада ҳушига келади ва ўзини зинадан итариб юборган одам махсус бош кийимда бўлгани учун таний олмаганини, бироқ унинг гавдаси эри Игорникидан фарқ қилишини айтади. Демак, мотоциклда бориб аёлни чуқурга итариб юборган унинг эри эмас. Игор ҳеч қаерга кетмаслик шарти билан қўйиб юборилади.

Кўп ўтмай Марина шифохонадан чиқади. Игор унинг олдига қайтади ва эр-хотин маслаҳатлашиб, ажрашишга қарор қилишади. Ундан аввал эса ўзаро келишиб, боланинг отасини аниқлаш мақсадида анализ топширишади. Сўнгги пайтларда Марина чақалоқни туғуруқхонада алмаштириб қўйишган деган гумонга бора бошлаганди.

Ўша кунларда туғуруқхонада Маринага доялик қилган врач Евгений Баришников шубҳали тарзда ўлдириб кетилади. Уни юк машинаси босиб кетган эди. Суриштирувларда ташкилотлардан бирига қарашли юк машинасини гараждан ўғирлаб олиб чиқишгани, ҳайдовчининг бундан хабари бўлмагани аниқланади.

Шундан сўнг милиция жиноят тугуни туғуруқхонада эканига амин бўлиб, Баришниковга ёрдам берган акушер Ирина Соничевани сўроқ қилади. У бола ҳақиқатан Маринаники эканини айтиб туриб олади. Аммо эртаси куни Иринани ҳам ишхонасида ўлдириб кетишади.

Туғуруқхонадагилар сўроқ қилинганда ходимлардан бири Иринанинг олдига амалиётчи формасида бўлган ёши каттароқ одам кириб чиққанини айтади.

Бу орада Игор ва Марина топширган анализнинг жавоблари чиқади. Ҳужжатда қора танли боланинг ота-онаси Игор ва Марина эмаслиги ёзилганди. Демак болани туғуруқхонада алмаштириб қўйишган. Лекин нега?

Жиноятчининг топилиши

Иккита қотилликдан сўнг милиция жиддий тортади ва суриштирув ҳамда қидирув ишларини кучайтиради. Энг аввал Иринанинг олдига кириб чиққан “амалиётчи”ни топиш керак эди.

Милиция Калуга ва унинг атрофида яшовчи ашаддий жиноятчиларнинг фотосуратларини туғуруқхонадагиларга бирма бир кўрсатиб чиқади. “Амалиётчи”ни кўрган ходим уни расмлар орасидан топиб беради. Бу хавфли рецивидист Федор Шаповал эди.

Шаповал дастлабки сўроқданоқ ўзини Игорнинг бошлиғи бўлган аёл Наталя Рудинская ёллаганини айтади. Хўш, бу аёлга врач ва акушерни ўлдириш нега керак бўлганди?

Маълум бўлишича, аёл ўз ҳайдовчиси Игорни севиб қолган. Бироқ эркакнинг уйланган экани аёлнинг йўлига ғов бўлган. У Игорга суйкалиб бир неча маротаба хотини билан ажрашиб, ўзига уйланишига шама қилган. Бироқ йигит аёлнинг гапларини эътиборсиз қолдирган.

Марина ҳомиладор бўлганини эшитиб Ирина аёлдан ўч олишга қарор қилади. У Игорнинг боласини ўзига олиб, туғруқхонага ташлаб кетилган болани унинг ўрнига қўйиш режасини тузади.

Бироқ айнан Маринанинг кўзи ёриган пайтда касалхонада кимдир ташлаб кетган қора танли бола бор эди. Врач билан тил бириктирган Наталя Марина туққан болани олиб қолиб, ўрнига ўша қора танли болани қўяди. У шу йўл билан Марина хиёнатда айбланишини ва Игор уни ташлаб кетишини мўлжалланганди.

Бироқ вазият у кутгандай бўлмагач Рудинская Маринани ўлдиришга ва шу йўл билан Игордан ҳам жавобсиз севги учун қасос олишга қарор қилади. Аёл бу ишни айнан Баришниковга топширади. Врач аввалига кўнмайди. Шунда Рудинская унга чақалоқларни алмаштиргани учун қаматиб юбориш билан таҳдид қилади. Чорасиз қолган Баришников мотоциклда келиб аёлни зинадан итариб юборади.

Врач Маринанинг жонига қасд қилиш учун бекорга мотоциклда бормаганди. Рудинская барча Маринани Игор итариб юборган деб ўйласин деб врачга шундай қилишни буюрганди. Марина тирик қолгач ишлар чигаллашади.

Милиция туғуруқхонага бориб врачни сўроққа тутади. Шунда Баришников ваҳимага тушади ва Наталяга милицияга бориб барчасини тан олмоқчи эканини айтади. Шундан сўнг Наталя хавфли рецивидистни ёллаб, аввал врачни, сўнг унга ёрдам берган акушерни ўлдиради.

Ëлланма қотилнинг кўрсатмасидан сўнг милиция дарҳол Наталя Рудинскаяни ҳам ҳибсга олади. Аёл аввалига ўз қилмишларини тан олмайди. Бироқ Шаповал билан юзлаштирилгандан сўнг барчасини айтиб беради.

Тергов тугагач иш судга оширилади. Суд Наталя Рудинскаяга 7 йил қамоқ жазосини беради. Унга ёлланган хавфли рецивидист Шаповал эса ўлим жазосини олади ва кўп ўтмай ҳукм ижро этилади.

Ғайрат Йўлдош тайёрлади.