Британияда атиги икки кун аввал сотиб олинган Range Rover ўғрилаб кетилди. У сўнгги ҳимоя тизими билан жиҳозланганди

Буюк Британиянинг Уорикшир графлигида қиймати 183 минг фунт стерлинг бўлган Range Rover автомобили ўғирлаб кетилди. Машина эгаси уни воқеадан атиги 60 соат олдин сотиб олганди. Қизиғи шундаки, автосалонда эркакка ушбу моделни “ўғирлаб бўлмайди” деб айтишган.

Жон (эркакнинг фамилияси келтирилмаган) 2024 йил 13 декабрда Буюк Британияда ишлаб чиқарилган 550 та нусхадан иборат чекланган серияли Range Rover учун барча ҳужжатларни расмийлаштирган. Автомобил массаж ўриндиқлари, 4D тактил аудио тизими ва қуйма ғилдирак дисклари билан жиҳозланган. Автосалондагилар янгиланган хавфсизлик тизими туфайли бу машинани амалда “ўғирлаб бўлмаслигини” ҳам айтишган.

Эртаси куни тахминан соат 15:30 да Жон автосалондан машинасини олиб кетди ва 60 соатга етмай, уни ўғирлаб кетишди. Воқеа 17 декабр куни эрта тонгда содир бўлди. Кузатув камераларидаги ёзувларга кўра, жиноятчиларга автомобилни ўғирлаш учун атиги 15 дақиқа кифоя қилган.

Янги Range Rover Жоннинг уйи ёнида турганди. Кузатув камераларидан олинган тасвирларда икки эркак унинг ҳовлисига яқинлашаётгани кўринади. Учинчиси эса кўчанинг нариги томонидан кузатиб турган. Жиноятчилар автомобилга қандай киргани номаълум. Фақат улардан бири ҳайдовчи ўриндиғига ўтиргани, сўнгра учови ҳам жўнаб кетгани кўринган.

Жон тахминан тунги соат учда уйғониб, автомобилига ўрнатилган трекерни кузатувчи компаниядан бир нечта жавобсиз қўнғироқлар бўлганини кўрди. У деразадан ташқарига қараб, яқинда сотиб олган машинаси ўз жойида йўқлигини пайқади.

Жон Жагуар Land Rover бош директорига шикоят хати ёзди. JLR мижозлар билан ишлаш маркази эркакнинг хатига қуйидагича жавоб берди:

“Масъулиятли ишлаб чиқарувчи сифатида, биз хавфни камайтириш мақсадида ўғриликнинг олдини олиш тизимларини жорий этганмиз. Бироқ фақатгина бу чораларга таяниб қолиш керак эмас. Транспорт воситасининг ўғирланиши барча транспорт воситалари эгалари дуч келадиган хавф, биз бу борада жавобгарлик тўғрисидаги даъволарни кўриб чиқмаймиз”.

Машина топилмади. Daily Mail хабар беришича, Буюк Британияда автомобилларни ўғирлаб, сўнгра уларни Африка, Шарқий Европа ва Яқин Шарққа олиб ўтадиган жиноий гуруҳлар фаолият юритмоқда.