Қайси соҳа вакиллари даромадлари ошишини кўпроқ кутяпти?

Марказий банк 2024 йил IV чораги бўйича аҳолининг истеъмол кайфияти шарҳини эълон қилди. Унда бир қанча аҳамиятли жиҳатни кўриш мумкин.

Даромад субиндекси

Жорий йил IV чоракда даромад субиндекси аввалги чоракка нисбатан 0,4 бандга яхшиланиб, 71,1 бандга тенг бўлган.

Келгусида даромадлар ошишини кутаётганлар улуши 2,3 фоиз бандга ошиб, 66,4 фоизни ташкил этган бўлса, даромадлари камайишини таъкидлаганлар улуши 0,3 фоиз бандга қисқариб, 10,2 фоиз доирасида шаклланган. Даромадлари ўзгармаслигини қайд этганлар улуши 2 фоиз бандга камайиб, умумий респондентларнинг 23,2 фоизига тенг бўлган.

Келгусида даромади ошишини кутаётган респондентларнинг аксарият кўпчилиги 10-15 млн сўм ва 15 млн сўмдан юқори ойлик даромадга эга бўлган гуруҳларга тўғри келмоқда. Даромади нисбатан пастроқ (3 млн сўмгача) бўлган аҳоли вакилларининг келгусида даромади ортиши бўйича кутилмалари қолган даромад гуруҳларига нисбатан пастроқ шаклланган.

Респондентларнинг 68 фоизи (ўтган чоракда 67 фоиз) расмий иш хақидан даромад олишини таъкидлаган.

Сўровда кафе-ресторан, савдо ва ишлаб чиқариш соҳаларида фаолият юритувчилар даромадларининг ошиши бўйича оптимистик кутилмаларни қайд этган бўлса, аксинча, АТ ва ОАВ, давлат бошқаруви ва тиббиёт соҳасидагиларнинг кутилмалари нисбатан пессимистик бўлган.

Харажат субиндекси

Тўртинчи чоракда респондентларнинг кўпчилиги пулнинг катта қисмини таълим (26 фоиз), уй-жой таъмири (21,6 фоиз) ва даволаниш (19 фоиз) учун сарфлашганини қайд этган.

Жамғариш субиндекси

Таҳлилларга кўра, аксарият респондентлар (жамига нисбатан тахминан 40 фоиз) жамғармалари мавжуд эмаслигини таъкидлаган. Шунингдек жамғармалари 1 ойгача етадиган респондентлар улуши тахминан 32 фоизни ташкил этган бўлса, 1−3 ойгача бўлган давр учун ушбу кўрсаткич тахминан 17 фоизга тенг бўлган.