Сўровда қатнашганларнинг айримлари йўлкиранинг ошишини табиий ҳолат деб ҳисоблашини айтди. Уларнинг фикрича, транспортнинг ўз харажатлари бор ва тариф ошиши шу харажатларни қоплашга хизмат қилиши мумкин.

«Замон талаби, ҳамма жойда нарх-наво кўтариляпти. Транспортнинг ўз харажатлари бор», — дейди сўров иштирокчиларидан бири.

Яна бир фуқаро метро ва транспорт тизимининг харажатларини ҳисобга олиб, янги тарифни тушуниш мумкинлигини айтди. Унинг фикрича, амалдаги нарх транспорт харажатларини тўлиқ қопламаслиги мумкин.

Айримлар эса электрон тўловдаги чегирмалар ва имтиёзлар сабаб янги тарифни унчалик сезмаслигини билдирди. «Агар ҳозиргидек ATTO карталарда ёки қайсидир банк карталарида скидкалар бўлса, масалан, 990 сўмлик чегирмалар бўлса, мен учун унчалик сезилмайди. Шу чегирмалар бўлса, йўлкиранинг ошиши катта фарқ қилмайди», — деди фуқаролардан бири.

Сўровномада қатнашганларнинг барчаси ҳам бу фикрда эмас. Айрим респондентлар ҳозирги 1 700 сўмлик тарифни сақлаб қолиш кераклигини, айниқса, талабалар ва жамоат транспортидан кўп фойдаланадиган қатлам учун бу сезиларли таъсир қилиши мумкинлигини билдирди.

«Студентларга қийин бўлади. Ўқиш билан бирга ишлайдиганлар ҳам бор, шунинг учун қийинроқ бўлади», — деди сўров иштирокчиларидан бири.

«Сифатни ошириш, транспорт сифатларини яхшилаш бўлиши керак», — деди респондентлардан бири.

Эслатиб ўтамиз, 2023 йил 1 ноябрдан пойтахтда автобус ва метродан фойдаланишда йўл ҳақи нақд шаклда тўланганда 2000 сўм, ATTO ёки банк картаси орқали тўланганда эса 1700 сўмни ташкил этиши белгиланганди.

Бунга қадар Тошкентда автобус ва метро йўл ҳақи 1 400 сўм бўлган ва бу тариф 2019 йил 15 августдан амал қилган.