Ҳонгконг оператори Панама канали портларини АҚШга сотади

Hutchison'нинг 4 март, сешанба куни эълон қилган баёнотига кўра, Ҳонгконгда жойлашган Hutchison Holdings, Панама каналининг қарама-қарши учларидаги портлар оператори уларни Америка консорциумига сотиш ниятида. Унга кўра, оператор акцияларининг 90 фоизи инвестор Blackrock бошчилигидаги компаниялар гуруҳига 19 миллиард долларга тушиши керак. Келишув АҚШ президенти Доналд Трампнинг кучли босимидан сўнг амалга ошади.

AFP хабар беришича, ҳонгконглик миллиардер Ли Кашиннинг Hutchison Holdings гуруҳи шуъба корхонаси бўлган Panama Ports Company ҳозирда Панама каналининг Атлантика томонидаги Кристобал ва Тинч океани томонидаги Балбоа портларини бошқаради. 2021 йилда ушбу шартнома автоматик равишда яна 25 йилга узайтирилди. Гуруҳнинг таъкидлашича, келишув бошқа портлар, масалан, Ҳонгконг ёки Шенчжендаги активларга таъсир қилмайди.

АҚШ ва Панама хавфсизлик соҳасида ҳамкорликни кенгайтиришга келишиб олди

6 феврал куни маълум бўлишича, Панама президенти Хосе Раул Мулино ва Пентагон раҳбари Пит Хегсет ўртасидаги музокаралар натижасида томонлар хавфсизлик соҳасидаги ҳамкорликни кенгайтиришга келишиб олган. «Улар Қўшма Штатлар ва Панама ўртасида мустаҳкам муносабатлар мавжудлиги ва хавфсизлик бўйича кўплаб манфаатлар, жумладан Панама каналини ҳимоя қилишда умумий манфаатлар мавжудлиги ҳақида келишиб олдилар», — дейилади АҚШ Мудофаа вазирлиги баёнотида.

Ундан уч кун олдин Панама президенти ўз мамлакати Хитойнинг Панама каналидан савдо мақсадларида фойдаланиш бўйича ҳамкорликни ўз ичига олган «Бир камар, бир йўл» ташаббусидан чиқишини айтди. 2 феврал куни Марко Рубио Хосе Раул Мулино билан учрашувда Хитойнинг Панама каналига таъсиридан норозилигини билдирди. Давлат департаменти раҳбари «мавжуд вазиятни қабул қилиб бўлмаслигини ва зудлик билан ўзгартирилмаса, Қўшма Штатлар ўз ҳуқуқларини ҳимоя қилиш учун чора кўришини айтди», — деди АҚШ Давлат департаменти матбуот хизмати раҳбари Тэмми Брюс.