Ню-Жерсидаги кутубхонадан 99 йил аввал олинган китоб қайтарилди

Китобни олган инсон аллақачон оламдан ўтган, уни марҳумнинг набираси қайтарди.

Фото: WPVI

Ню-Жерсида яшовчи 81 ёшли Мери Купер бобоси 1926 йилда кутубхонадан олиб келган китобни топиб олди. Аёл китобни муассасага қайтарди, деб хабар бермоқда CNN.

Китоб ёғоч, металл ва маиший буюмлардан болалар ўйинчоқларини ясаш ҳақида бўлиб, у 1911 йилда чоп этилган. Купернинг бобоси уни вафотидан бир йил олдин кутубхонадан олган. Аёлнинг тахминича, бобоси китоб ёрдамида қизи, яъни Мерининг онаси учун бирор нарса ясамоқчи бўлган.

Мери Купер китобни кутубхонага қайтаришга қарор қилган. Шу билан бирга у китоб кечиктирилгани учун жарима тўлаши мумкинлигидан хавотирланган. Муассаса тўлов талаб қилса, жарима миқдори 18 минг долларгача етиши мумкин эди.

Китобни кўриш учун кутубхонанинг 10 нафар ходими жамланди ва унинг қайтарилганидан ниҳоятда мамнунлигини билдиришди. Китоб Томс-Ривердаги эсдалик буюмлар кўргазмасининг бир бўлагига айланди, уни барча ташриф буюрувчилар томоша қилиши мумкин.

Аввалроқ Екатеринбург кутубхонасидан 106 йил аввал олинган китоб қайтарилган эди. Маҳаллий аҳоли вакили уни оилавий буюмлар орасидан топиб олган.

#кутубхона #китоб #эсдалик #Ню-Жерси