Панамада энергия таъминоти блэкаутдан сўнг тикланди

Панамада 16 март, якшанба куни бутун мамлакат бўйлаб узилишдан бир неча соат ўтиб электр энергияси қайта тикланди. Хусусий электр генераторида рўй берган портлашдан сўнг миллий электр тармоғи хавфсизлик нуқтайи назаридан тўхтатилди, деб тушунтирди Панама президенти Хосе Раул Мулино X ижтимоий тармоғида. «Аста-секин хизмат кўрсатиш тикланади. Тинчланинг», деб ёзди у. Портлашнинг аниқ сабаблари ошкор этилмаган.

Электр таъминотидаги узилиш, ўз навбатида, тахминан 4,5 миллион аҳолига эга бўлган мамлакат бўйлаб сув тозалаш иншоотлари ва қудуқларнинг ишлашига таъсир қилди, деб хабар беради IDAAN миллий агентлиги.

Панама президенти мамлакат аҳолисини хотиржамликка чақиришдан бироз аввал содир бўлган воқеадан норозилигини билдирди. «Буни оқлаб бўлмайди. Хабарларга кўра, зарар жуда катта. Мен энергетика вазиридан душанба кунига қадар ҳисобот тақдим этишини сўрайман. Бундай ёмон хизмат кўрсатишга чидаб бўлмайди», — деб ёзган Мулино.

Кейинроқ давлат раҳбари портлаш содир бўлгани тахмин қилинган жойнинг видеоси билан бўлишди: тунги осмонда ёруғлик чақнашлари ва тутун булути кўринган.