Siemens бутун дунё бўйлаб 6000 дан ортиқ иш ўринларини қисқартиради

Германиянинг Siemens саноат концерни бутун дунё бўйлаб ўз бўлинмаларида 6000 дан ортиқ иш ўринларини қисқартиради — бу немис иқтисодий гиганти ходимлари умумий сонининг тахминан 2 фоизини ташкил қилади. Гуруҳ 18 март, сешанба куни Германияда 2850 иш ўрни қисқартирилиши, аммо мамлакатда ишдан бўшатишлар бўлмаслиги ҳақида маълум қилди. Қарор асосий бозорлар — Хитой ва Германияда талабнинг пасайиши билан боғлиқ.

Ўзгаришлар иккита бўлинмага таъсир қилади

Қисқартиришлар биринчи навбатда корхоналар ишини автоматлаштириш бўйича ишланмалар билан шуғулланувчи ва бутун дунё бўйлаб 68 мингга яқин кишини иш билан таъминловчи Digital Industries (DI) бўлинмасига таъсир қилади. 2027 молиявий йил охирига бориб 5600 га яқин иш ўрни тугатилади, улардан 2600 таси - Германияда.

Бундан ташқари, концерн электромобилларни қувватлантириш учун аккумуляторларни ишлаб чиқарувчи бўлинма ходимлари сонини қисқартиради. Секторда 1300 дан ортиқ киши ишлайди, улардан 450 нафари, шу жумладан Германияда 250 нафари ишдан бўшатилади.

Siemens ходимларига Германияда қайта ўқиш таклиф этилади

Siemens гуруҳининг Германиядаги филиалларида 86 000 киши ишлайди. Ишнинг қисқариши натижасида зарар кўрган ходимларга қайта ўқиш ёки қўшимча таълим олиш таклиф этилади. Ишдан бўшатилганларнинг концерн доирасидаги бошқа лавозимларга ўтказилиши ҳам «муҳим рол» ўйнайди. Siemens ҳозирда Германияда 2000 га яқин ходимларни қидирмоқда.

Охирги ойларда бир нечта немис корпорациялари кенг миқёсда иш жойларини қисқартириши ҳақида эълон қилди: Volkswagen автомобил ишлаб чиқарувчиси, SAP энг йирик немис дастурий таъминот ишлаб чиқарувчиси, автомобилсозлик саноати учун асосий компонентлар етказиб берувчи Bosch, почта концерни Deutsche Post ва бошқалар. 17 март куни Audi компанияси 2029 йилга бориб 7500 та иш жойини қисқартиришини эълон қилди.