Швецияда тухумни қизининг пешонасига уриб чаққан аёл жаримага тортилди

Швециянинг Ҳелсингборг шаҳрида яшовчи 24 ёшли аёл TikTokʼдаги видео учун жаримага тортилди. Роликда у тухумни қизининг пешонасига уриб чаққани тасвирланган.

Қайд этилишича, воқеа ўтган йили содир бўлган. Она қизига биргаликда олмали пирог пиширишни таклиф қилган. Шундан сўнг аёл тухумни қизнинг пешонасига уриб чаққан ва ҳолатни видеога олган. Қиз юз берган ҳолатдан ҳайратга тушиб, бу унга ёқмаганини айтган. Аёл эса бунга жавобан кулган.

TikTokʼка жойланган ушбу ролик қарийб 100 минг маротаба кўрилган. Видеога эътибор қаратган ижтимоий тармоқ фойдаланувчиларидан бири бу ҳақида полицияга хабар берган. Натижада, аёлга «болага нисбатан зўравонлик қилиш» айблови илгари сурилган.

Она судда қилган иши қўпол ҳазил эканини маълум қилиб, TikTokʼда бу каби видеолар трендда бўлгани ва кўплаб ота-оналар шундай роликларни тасвирга олганини таъкидлаган. Аммо прокурор аёл болани «таҳқирлади» деб топган ва унинг ҳаракатларини «ўйламай қилинган иш» дея таърифлаган.

Натижада, аёл айбдор деб топилган ва 20 минг крона (2 минг доллардан ортиқ) миқдорида жаримага тортилган.