Трамп саратон касаллиги аниқланган Байденни қўллаб-қувватлади

АҚШ президенти Доналд Трамп ўзи ва рафиқаси Мелания номидан 18 май, якшанба оқшомида Америка давлати раҳбари лавозимидаги ўзидан олдинги президент, агрессив шаклда простата саратони ташхиси қўйилган Жо Байденни қўллаб-қувватлашини билдирди.

«Мелания ва мен Жо Байденга яқинда қўйилган тиббий ташхисдан хафамиз. Биз Жилл ва унинг оиласига энг самимий ва эзгу тилакларимизни йўллаймиз, Жога эса тез ва муваффақиятли тузалиб кетишини тилаймиз», деб ёзди Оқ уйнинг амалдаги раҳбари ўзининг Truth Social ижтимоий тармоғида.

Ўз навбатида, АҚШнинг собиқ президенти Барак Обама Байден саратонга қарши «қатъият» билан курашишига ишонч билдирди. «Мишел ва мен бутун Байден оиласи билан бирдаммиз. Саратоннинг барча кўринишларида илғор даволаш усулларини топиш учун ҳеч ким Жодан кўра кўпроқ иш қилгани йўқ ва ишончим комилки, у ўзининг қатъиятлилиги билан бу қийинчиликка қарши курашади. Биз унинг тез ва тўлиқ соғайиб кетишини тилаймиз», деб ёзди у X ижтимоий тармоғида.

АҚШ собиқ вице-президенти ва 2024 йилги президентлик сайловига Демократик партиядан номзод Камала Харрис ўзининг X микроблогида шундай ёзди: «Жо — курашчи. Биламан, у бу қийинчиликка ўзининг ҳаёти ва етакчилигини ҳар доим белгилаб берган куч, чидамлилик ва оптимизм билан қатъий туради. Биз тўлиқ ва тез тузалиб кетишига умид қиламиз».