Бухорода 36 нафар боғча тарбияланувчиси иккита Damas’да ташилди

Бухоро вилоятида Damas русумли транспорт воситаларида ўнлаб болаларни ташиш ҳолатлари аниқланди, деб хабар беради ИИВ ЙҲХХ ахборот хизмати.

Қайд этилишича, Жондор туманида ЙПХ ходимлари томонидан иккита Damas машинаси тўхтатилган. Улар жами 36 нафар — биринчисида 20, иккинчисида 16 нафар боғча боласини олиб кетаётган бўлган.

«Ушбу хавфли ташишлар болаларни боғчалардан олиб келишда содир бўлган ва фақатгина йўл ҳаракати инспекторларининг ўз вақтида аралашуви туфайли юз бериши мумкин бўлган фожиа олдини олишга эришилди. Ўта масъулиятсизликка йўл қўйган ҳайдовчилар аллақачон жавобгарликка тортилди», — дейилади хабарда.

Ҳолат юзасидан ҳайдовчиларга тегишли чоралар кўрилган, шунингдек, боғча масъулларига чора кўриш учун юқори турувчи ташкилотларга тақдимнома киритилган.

Ўзбекистонда болаларни Damas автомобилида ноқонуний ташиш ҳолати мунтазам равишда аниқланади. Аввалроқ Сурхондарё вилоятининг Денов туманида Damas машинаси 32 нафар бола, Қашқадарёда эса 17 нафар бола олиб кетаётгани аниқланган эди.