Термизда 219 туп дарахт ноқонуний кесилди

Сурхондарё вилояти маркази Термиз шаҳридаги «Дўстлик» маҳалласида 219 туп дарахт, жумладан элдор қарағайи, вергин арчаси, шарқ биотаси, чинор ва бошқа навлар ноқонуний тарзда кесиб ташлангани аниқланди. Бу ҳақда вилоят Экология бошқармаси хабар берди.

Қайд қилинишича, ҳудудда кўп қаватли турар-жой мажмуаси қурилиши дастлаб «Gigant Tosh Qurilish» МЧЖ, кейинчалик эса ушбу объектни мерос қилиб олган «Developments Rest» МЧЖ томонидан амалга оширилмоқда.

Қурилиш учун ажратилган ер майдонида 356 туп дарахт бўлиб, улар 2025 йил март ойида вилоят экология бошқармаси мутахассислари томонидан расмий хатловдан ўтказилган. Қурилиш ишлари бошланишидан аввал жамоатчилик эшитувлари ҳам ташкил этилган, мавжуд дарахтларни кўчириш режалаштирилган. Корхоналар томонидан дарахтларни кўчириш бўйича юборилган сўров вилоят Экология бошқармаси дарахт кўчириш мавсуми эмаслиги сабабли рад этилган.

Бироқ, белгиланган тартиб ва ҳужжатларсиз, июн ойида ҳудуддаги 219 туп дарахт, жумладан элдор қарағайи, вергин арчаси, шарқ биотаси, чинор ва бошқа навлар ноқонуний тарзда кесиб ташлангани аниқланган.

Таъкидланишича, қимматбаҳо ва камқимматли дарахтларнинг ноқонуний кесилиши оқибатида ўсимлик дунёсига жуда катта миқдорда экологик ва иқтисодий зарар етказилган. Унинг миқдори хабарда келтирилмаган.

Ҳолат бўйича тегишли ҳужжатлар вилоят прокуратурасига ҳуқуқий баҳо бериш учун тақдим этилган.