Япониялик олимлар озишнинг кутилмаган усулини ишлаб чиқади

Осака университети тадқиқотчилари бир марталик генетик аралашув орқали семизлик ва қандли диабетдан халос қилиш усулини таклиф қилмоқда.

Япониялик олимларнинг янги тадқиқоти семизлик ва қандли диабетни даволашга бўлган ёндашувни тубдан ўзгартириши мумкин. Одатда вазн камайтирувчи дорилар мунтазам укол тарзида юборилади, аммо Осака университети тадқиқотчилари бундай заруратни йўқотадиган бир марталик генетик аралашув усулини таклиф қилди.

Бу ёндашув одатдаги ген терапиясидан фарқ қилади: олимлар касалликка сабаб бўладиган мутацияларни тузатиш ўрнига, сичқонларнинг жигар ҳужайраларига GLP-1 гормони муқобили бўлган эксенатидни кодловчи янги генни киритди. Эксенатид иштаҳани пасайтиради ва моддалар алмашинувини яхшилайди. У диабет ва семизликка қарши ишлатиладиган дори таркибида мавжуд, лекин ундан доимий равишда фойдаланиб юриш керак.

«Бизнинг ёндашувимиз ген терапияси ва биологик дорилар афзалликларини бирлаштирди. Тадқиқотимиз шуни кўрсатдики, зарур генни организмга киритиш орқали ҳужайралар бир неча ой давомида керакли модда ишлаб чиқаришни ўзлари давом эттириши мумкин — бу эса доимий уколларга эҳтиёжни йўқотади», — дейди тадқиқот раҳбари Кейичиро Сузуки.

Таржибага учраган сичқонларда экзенатид даражаси қонда узоқ вақт барқарор сақланиб турган, улар камроқ овқат истеъмол қилган, секинроқ семирган ва глюкозани яхшироқ ўзлаштирган. Ҳеч қандай ножўя таъсирлар қайд этилмаган.

Олимларнинг фикрича, бу усул нафақат семизлик, балки 2-тур қандли диабет ва яллиғланиш касалликлари каби аниқ генетик мутацияларга боғлиқ бўлмаган бошқа сурункали касалликларни ҳам даволаш учун мос келиши мумкин.

Агар ушбу усулнинг самарадорлиги кейинги тадқиқотларда тасдиқланса, у узоқ муддатли таъсирга эга бўлган, беморларни мунтазам уколдан халос этувчи, ҳаёт сифатини оширувчи янги дори воситаларининг асосига айланади.