Бангладеш бўйича Халқаро жиноий трибуналнинг уч судяси инсониятга қарши жиноятларда айбланаётган мамлакат ҳукуматининг собиқ раҳбари Шайх Ҳасинага қарши жиноий ишни кўриб чиқа бошлади, деб ёзади Британиянинг The Guardian газетаси. «Унинг оммавий норозилик намойишларини бостиришга уриниши қуролланган полицияни қўллашни ўз ичига олган, улар ўлдиришга буйруқ олиб, кўчаларда тинч аҳолига қарата ўқ отган», деб эслатилган мақолада. 2024 йил август ойида ушбу ҳаракатлар натижасида Бангладешда камида 1400 киши ҳалок бўлди.
2024 йил 5 август куни ҳарбий вертолётда Ҳиндистонга учиб кетган 77 ёшли Ҳасина судда иштирок этмайди. У ўзининг айбсизлигини эълон қилди ва судда иштирок этишдан бош тортди. Уни экстрадиция қилиш ҳақидаги кўплаб сўровлар эътибордан четда қолган. Ҳасина ҳокимият тепасида 15 йилдан кўпроқ вақт бўлган.
Шайх Ҳасина қочиб кетганидан бир кун ўтиб Бангладеш президенти Шаҳабуддин Чуппу Даккадаги парламентни тарқатиб юборди. Орадан уч кун ўтиб, тинчлик бўйича Нобел мукофоти лауреати Муҳаммад Юнус муваққат ҳукумат раҳбари этиб тайинланди, у шу кунгача бу лавозимда.
Бангладешдаги норозилик намойишлари талабаларнинг мамлакат мустақиллиги учун уруш қатнашчиларининг қариндошлари учун меҳнат квоталари бекор қилиниши талаби билан бошланди, кейин эса кенгайди: намойишчилар Ҳасинанинг истеъфосини талаб қилди. Бу 2024 йил июл ойининг охирида суднинг квотани қисқартириш тўғрисидаги қарори билан якунланган аввалги намойишлар тўлқини чоғида ҳукуматнинг намойишчиларга нисбатан зўравонлигига жавобан содир бўлди. Ўшанда 200 га яқин киши ҳалок бўлган.
