Chevrolet Silverado бир марта тўлиқ қувватланиш билан 1705 км масофа босиб ўтди

Синовлар компаниянинг Милфордда жойлашган полигонига яқин ҳудуддаги умумий йўллар ҳамда Детройнинг Белл-Айл автопаркида ўтказилди. Silverado соатига тахминан 32–40 км тезликда ҳаракатланиб, “ақлли бошқарув технологиялари”дан фойдаланди. Расмий маълумотларга кўра, пикап бир марталик қувватланиш билан 793 км масофа босиб ўтиши мумкин. Бироқ муҳандислар махсус созламалар орқали бу кўрсаткичдан анча юқори натижа — 1705 кмни қайд этишнинг уддасидан чиқди.

Таъкидланишича, синовлар ёз фаслида ўтказилиши батареянинг максимал самарадорлигини таъминлашга ёрдам берган. Муҳандислар шамол қаршилигини камайтириш учун олд ойна тозалагичини пастга туширган, шиналардаги ҳаво босимини энг энг юқори даражагача кўтариб, ортиқча оғирликни камайтириш мақсадида захира ғилдиракни ҳам олиб ташлаган. Бундан ташқари, пикап юкхонасининг устига махсус қоплама билан ёпилиб, ҳаво оқими яхшиланган ва бутун синов вақтида кондиционер тизими тўлиқ ўчириб қўйилган.

Маълумот учун, Silverado’нинг 2026 йилги версиясининг Work Truck Max Range комплектацияси 205 kWh батарея билан жиҳозланган. Машина пикап бўлишига қарамай, 5,4—5,8 сонияда 100 км тезликка чиқа олади. 

Ҳозирда электромобилларнинг битта қувватлашда энг узоқ масофа босиб ўтиш бўйича расмий рекорди Lucid компаниясининг Air Grand Touring седанига тегишли. У 1205 км масофа босиб ўтиб, аввалги 1045 километрлик Mercedes-Benz EQS 450+ рекордини янгилаган.

GM эса Silverado’нинг бу рекордини расмийлаштиришни режалаштираётгани йўқ. “Ҳозирча Гиннеснинг рекордлар китобига мурожаат қилиш ниятимиз йўқ. Бу фақатгина муҳандисларимиз ўтказган тажриба эди”, — деди компания вакили Кетрин Скеилс.